សកម្មជនស៊ុយអែត នាង Greta Thunberg កាលពីថ្ងៃអង្គារ (ទី៧ ខែតុលា) បានប្រាប់ថា រូបនាង និងអ្នកជាប់ឃុំដទៃទៀតនៃកងនាវាផ្ដល់ជំនួយដល់តំបន់ហ្កាហ្សា ត្រូវបានទទួលរងនូវការធ្វើទារុណកម្ម នៅក្នុងពន្ធនាគារអ៊ីស្រាអែល ជាទីដែលពួកគេត្រូវបានឃុំខ្លួន។

នៅឯសន្និសីទសារព័ត៌មាន ក្នុងទីក្រុង Stockholm ប្រទេសស៊ុយអែត នាង Thunberg បាននិយាយថា រូបនាង និងមនុស្សផ្សេងទៀត ត្រូវបាន «ចាប់ពង្រត់ និងធ្វើទារុណកម្ម» ដោយយោធាអ៊ីស្រាអែល។ នាងបានបដិសេធមិននិយាយលម្អិត ដោយបន្ថែមថា នាងមិនទទួលបានទឹកស្អាត ហើយអ្នកជាប់ឃុំផ្សេងទៀត មិនទទួលបានថ្នាំព្យាបាលជំងឺធ្ងន់ទេ។

នាងបានបញ្ជាក់បន្ថែមថា៖ «ដោយផ្ទាល់ខ្លួន ខ្ញុំមិនចង់ចែករំលែកអ្វីដែលខ្ញុំរងទុក្ខឡើយ ដោយសារខ្ញុំមិនចង់ឲ្យក្លាយជាព័ត៌មានក្ដៅនោះទេ ពីព្រោះវាមិនមែនជារឿងគួរយកចិត្តទុកដាក់នោះឡើយ»។ នាងបានសង្កត់ធ្ងន់ថា អ្វីដែលរូបនាង និងអ្នកដទៃទទួលរង គឺតិចតួចណាស់ បើប្រៀបធៀបទៅនឹងអ្វីដែលប្រជាជន នៅតំបន់ហ្កាហ្សា ជួបប្រទះរាល់ថ្ងៃ។

ក្រសួងការបរទេសរបស់អ៊ីស្រាអែល មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ ប៉ុន្តែបានបដិសេធម្តងហើយម្តងទៀតថា មិនបានធ្វើបាបអ្នកជាប់ឃុំនោះឡើយ។

គួរបញ្ជាក់ថា នាង Thunberg គឺជាផ្នែកនៃក្រុមផ្ដល់ជំនួយតាមនាវា Global Sumud Flotilla ដែលព្យាយាមទៅឲ្យដល់តំបន់ហ្កាហ្សា ដើម្បីចែកចាយការផ្គត់ផ្គង់ផ្សេងៗ និងទាក់ទាញឲ្យមានការយកចិត្តទុកដាក់ ចំពោះស្ថានភាព នៅដែនដីនេះ ដែលអ្នកស្រុកភាគច្រើននៃចំនួន ២,២លាននាក់ ត្រូវបានបណ្តេញចេញពីផ្ទះសម្បែងរបស់ពួកគេ ហើយអង្គការសហប្រជាជាតិ ប្រាប់ថា ភាពអត់ឃ្លានកំពុងកើនឡើង នៅទីនោះ។

នាង Thunberg ត្រូវបានឃុំខ្លួនរួមជាមួយមនុស្សចំនួន ៤៧៨នាក់ ហើយត្រូវបានបណ្តេញចេញពីប្រទេសអ៊ីស្រាអែល កាលពីថ្ងៃទី៦ ខែតុលា៕