នាយករដ្ឋមន្ត្រីអ៊ីតាលី លោកស្រី Giorgia Meloni កាលពីថ្ងៃអង្គារ (ទី៧ ខែតុលា) បានបញ្ចាក់ថា លោកស្រីត្រូវបានចោទប្រកាន់ពីបទ «សមគំនិតក្នុងអំពើប្រល័យពូជសាសន៍« នៅក្នុងពាក្យបណ្តឹងដាក់ទៅតុលាការព្រហ្មទណ្ឌអន្តរជាតិ (ICC) ពាក់ព័ន្ធនឹងការគាំទ្ររបស់ទីក្រុងរ៉ូម ចំពោះអ៊ីស្រាអែល នៅពេលដែលប្រទេសនេះទម្លាក់គ្រាប់បែកលើតំបន់ហ្កាហ្សា។

តាមរយៈការអត្ថាធិប្បាយដែលផ្សាយដោយប្រព័ន្ធផ្សព្វផ្សាយក្នុងស្រុក លោកស្រី Meloni បាននិយាយថា លោកស្រូត្រូវបានគេបញ្ចូលឈ្មោះនៅក្នុងឯកសារមួយដោយក្រុមតស៊ូមតិ សម្រាប់ប៉ាឡេស្ទីន ដែលបានចោទប្រកាន់លោកស្រី និងមន្ត្រីផ្សេងទៀតថា បានចូលរួមពាក់ព័ន្ធនឹង ដោយសារការផ្គត់ផ្គង់អាវុធដល់អ៊ីស្រាអែល។

លោកស្រីបានបន្ថែមថា ពាក្យបណ្តឹងនេះក៏បានសំដៅទៅលើរដ្ឋមន្ត្រីការពារជាតិរបស់លោកស្រីផងដែរ គឺលោក Guido Crosetto និងរដ្ឋមន្ត្រីការបរទេស លោក Antonio Tajani ហើយលោកស្រីក៏គិតថា លោក Roberto Cingolani ប្រមុខក្រុមការពារជាតិ Leonardo ត្រូវបានបញ្ចូលឈ្មោះដែរ។

គួរបញ្ជាក់ថា ក្រុមអ្នកស៊ើបអង្កេតរបស់អង្គការសហប្រជាជាតិបានចោទប្រកាន់អ៊ីស្រាអែលថា បានប្រព្រឹត្តអំពើប្រល័យពូជសាសន៍ នៅតំបន់ហ្កាហ្សាស្ទ្រីប ជាកន្លែងដែលប្រទេសនេះបានធ្វើសង្រ្គាមប្រឆាំងនឹងក្រុមសកម្មប្រយុទ្ធហាម៉ាសប៉ាឡេស្ទីន អស់រយៈពេល ២ឆ្នាំមកហើយ។ ICC ចេញដីកាចាប់ខ្លួនលោកនាយករដ្ឋមន្ត្រីអ៊ីស្រាអែល Benjamin Netanyahu និងអតីតរដ្ឋមន្ត្រីការពារជាតិ លោក Yoav Gallant។

ក្រុមតស៊ូមតិប៉ាឡេស្ទីនដែលនៅពីក្រោយពាក្យបណ្តឹងដែលមានបញ្ចូលឈ្មោះលោកស្រី Meloni នេះ កំពុងអំពាវនាវឲ្យតុលាការវាយតម្លៃនូវលទ្ធភាពបើកការស៊ើបអង្កេតជាផ្លូវការលើការចោទប្រកាន់នេះ៕