បេឡារុស្ស៖ កងទ័ពរុស្ស៊ី និងបេឡារុស្សបានរៀបចំត្រៀមសមយុទ្ធចម្បាំងរួមគ្នា លើការបាញ់ពីចម្ងាយនៅក្នុងប្រទេសបេឡារុស្សកាលពីថ្ងៃពុធ ខណៈភាពតានតឹងនៅតែក្ដៅ ក្រោមការគំរាមកំហែងនៃការផ្ទុះសង្គ្រាមចេះតែកើនឡើងជាមួយអ៊ុយក្រែន។ សមយុទ្ធនេះមានការចូលរួមពីអង្គភាពកាំភ្លើងវែង កាំភ្លើងធំ និងអង្គភាពមីស៊ីលប្រឆាំងរថក្រោះ ព្រមទាំងរថក្រោះកងទ័ពមកពីអង្គភាពរថក្រោះ និងរថពាសដែក។
ក្រសួងការពារជាតិរុស្ស៊ីបាននិយាយនៅក្នុងសេចក្ដីថ្លែងការណ៍ថា ក្នុងអំឡុងការហ្វឹកហ្វឺនការធ្វើចម្បាំងរួមគ្នានេះកងទ័ពរុស្ស៊ី និងបេឡារុស្សនឹងផ្ដោតលើប្រតិបត្តិការការពារ និងប្រឆាំងក្រុមប្រដាប់អាវុធខុសច្បាប់។ ខណៈការបន្ថែមកងទ័ពប្រមាណ ១០ម៉ឺននាក់ដាក់ពង្រាយជិតអ៊ុយក្រែន ប្រទេសរុស្ស៊ីបានផ្លាស់កងកម្លាំងចេញពីតំបន់ស៊ីប៊រី និងចុងបូព៌ា សម្រាប់ការធ្វើសយុទ្ធជាមួយបេឡារុស្សដែលជាសម្ព័ន្ធមិត្តរបស់ខ្លួន ដែលនៅជាប់ព្រំដែនអ៊ុយក្រែនផងដែរ។ ចំពោះកាហ្វឹកហាត់នេះអង្គភាពនានា និងរថយន្តជាច្រើនគ្រឿងរបស់រុស្ស៊ីបានចល័តទៅកាន់ជំរំយោធាមួយនៅជិតព្រំដែនជាមួយប្រទេសបូឡូញ។
ចំណែកនៅក្នុងប្រទេសអ៊ុយក្រែនវិញ អង្គភាពកាំភ្លើងធំរ៉ូកែតនៃកងកម្លាំងប្រដាប់អាវុធអ៊ុយក្រែន បានហ្វឹកហាត់នៅជិតព្រំដែនជាប់ជាមួយតំបន់គ្រីមៀ។ យោងតាមឧត្ដមសេនីយ៍អ៊ុយក្រែនលោក Serhiy Naev វគ្គបណ្ដុះបណ្ដាលនេះបានបង្ហាញពីការត្រៀមខ្លួន របស់កងកម្លាំងអ៊ុយក្រែនក្នុងការឆ្លើយតបទាន់ពេលវេលា ចំពោះសកម្មភាពឈ្លានពានណាមួយ។ គេសង្កេតឃើញថា ទាំងរុស្ស៊ី ទាំងអ៊ុយក្រែនបាននឹងកំពុងបង្កើនសកម្មភាពយោធារបស់ខ្លួនតាមរយៈការធ្វើសមយុទ្ធ និងវគ្គបណ្ដុះបណ្ដាលផ្សេងៗចាប់តាំងពីភាពតានតឹងឡើងខ្លាំងមួយរយៈមកនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
