នាយករដ្ឋមន្ត្រីបារាំងចាំផ្ទះ លោក Sebastien Lecornu បានបង្ហាញពីការមានសុទិដ្ឋិនិយមយ៉ាងប្រយ័ត្នប្រយែង នាថ្ងៃពុធ (ទី៨ ខែតុលា) នេះ ដោយនិយាយថា កិច្ចព្រមព្រៀងមួយអាចនឹងត្រូវបានសម្រេចឡើង ជុំវិញកញ្ចប់ថវិកាជាតិ នៅចុងឆ្នាំនេះ ជាការលើកឡើងដែលធ្វើឲ្យលទ្ធភាពនៃរៀបចំការបោះឆ្នោតមុនអាណត្តិកាន់តែរសាត់ឆ្ងាយទៅ។

ការកត់សម្គាល់របស់លោក Lecornu នេះ បានកើតឡើងនៅពេលដែលលោកគ្រោងនឹងបញ្ចប់កិច្ចពិភាក្សានៅថ្ងៃពុធជាមួយភាគីនានា ហើយរាយការណ៍ត្រលប់ទៅលោកប្រធានាធិបតី Emmanuel Macron អំពីថា តើលោកបានរកឃើញវិធីបញ្ចប់វិបត្តិនយោបាយដ៏អាក្រក់បំផុតជាលើកដំបូងរបស់ប្រទេស ក្នុងរយៈពេលជាច្រើនទសវត្សរ៍មកនេះបានហើយ ឬនៅ។

បន្ទាប់ពីមានកិច្ចប្រជុំ កាលពីថ្ងៃអង្គារ ជាមួយក្រុមអភិរក្សនិយម និងភាគីកណ្តាល-ស្តាំនិយម និងមុនពេលជួបជាមួយគណបក្សសង្គមនិយម (Socialist Party) លោក Lecornu បានប្រាប់អ្នកសារព័ត៌មានថា៖ «មានការបង្ហាញនូវឆន្ទៈ ក្នុងការឈានដល់កិច្ចព្រមព្រៀងថវិកា សម្រាប់ប្រទេសបារាំង នៅមុនថ្ងៃទី៣១ ខែធ្នូនៃឆ្នាំនេះ»។

លោកបានបញ្ជាក់បន្ថែមថា៖ «ហើយឆន្ទៈនេះបង្កើតឲ្យមាននូវសន្ទុះ និងការរួបរួមគ្នាជាក់ស្តែង ដែលធ្វើឲ្យការរំពឹងទុកនៃការរំលាយសភាកាន់តែលែងកើតមានឡើង»។

គួរបញ្ជាក់ថា លោក Macron បានប្រឈមមុខនឹងការអំពាវនាវពីក្រុមប្រឆាំងឲ្យរៀបចំបោះឆ្នោតសភា ឬលាលែងពីតំណែង ដើម្បីបញ្ចប់វិបត្តិនយោបាយ។ លោក Lecornu ដែលជានាយករដ្ឋមន្ត្រីទី៥ របស់បារាំង ក្នុងរយៈពេល ២ឆ្នាំ បានស្នើសុំការលាលែងពីតំណែង រួមជាមួយរដ្ឋាភិបាលរបស់លោក កាលពីថ្ងៃចន្ទ ពោលគឺប៉ុន្មានម៉ោងបន្ទាប់ពីគណៈរដ្ឋមន្ត្រីត្រូវបានប្រកាសកាលពីថ្ងៃអាទិត្យ ដោយធ្វើឲ្យវាក្លាយជារដ្ឋបាលអាយុកាលខ្លីបំផុត នៅបារាំងសម័យទំនើប។ ការសម្រេចនោះបានកើតឡើងបន្ទាប់ពីសម្ព័ន្ធមិត្ត ក៏ដូចជាក្រុមគូប្រជែង បានគំរាមផ្តួលរំលំរដ្ឋាភិបាលថ្មីរបស់លោក៕