ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ ៨ តុលា ថា អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀងដែលស្វែងរកជាយូរមកហើយសម្រាប់បទឈប់បាញ់នៅតំបន់ហ្កាហ្សា និងការដោះលែងចំណាប់ខ្មាំង ក្រោមផែនការរបស់លោកសម្រាប់ការបញ្ចប់សង្គ្រាមដែលមានអាយុកាលពីរឆ្នាំនៅក្នុងដែនដីប៉ាឡេស្ទីនដែលរងការឡោមព័ទ្ធមួយនេះ។  

មួយថ្ងៃបន្ទាប់ពីខួប ២ឆ្នាំ នៃការវាយប្រហាររបស់ក្រុមហាម៉ាស លើអ៊ីស្រាអែលដែលបង្កឱ្យមានការវាយលុកដ៏សាហាវរបស់អ៊ីស្រាអែលទៅលើតំបន់ហ្កាហ្សា ការពិភាក្សាដោយប្រយោលនៅក្នុងប្រទេសអេហ្ស៊ីប បានផ្តល់នូវកិច្ចព្រមព្រៀងមួយនៅលើដំណាក់កាលដំបូងនៃក្របខ័ណ្ឌ ២០ ចំណុចរបស់លោក Trump ។

កិច្ចព្រមព្រៀងនេះ ប្រសិនបើត្រូវបានអនុវត្ត វានឹងនាំឱ្យភាគីទាំងពីរខិតកាន់តែជិតជាងកិច្ចខិតខំប្រឹងប្រែងនានាកាលពីកន្លងទៅ ដើម្បីបញ្ឈប់សង្គ្រាមដែលបានវិវត្តទៅជាជម្លោះក្នុងតំបន់ ដោយអូសទាញប្រទេសមួយចំនួនដូចជា អ៊ីរ៉ង់ យេម៉ែន និងលីបង់ និងការផ្លាស់ប្តូរមជ្ឈិមបូព៌ា។

លោក Trump បាននិយាយនៅលើបណ្ដាញសង្គម Truth Social ថា ខ្ញុំមានមោទនភាពណាស់ក្នុងការប្រកាសថា អ៊ីស្រាអែល និងក្រុមហាម៉ាស បានចុះហត្ថលេខាលើដំណាក់កាលដំបូងនៃផែនការសន្តិភាពរបស់យើង ។ 

លោក Trump បានបន្ថែមថា នេះមានន័យថាចំណាប់ខ្មាំងទាំងអស់នឹងត្រូវបានដោះលែងក្នុងពេលឆាប់ៗនេះ ហើយអ៊ីស្រាអែលនឹងដកកងទ័ពរបស់ពួកគេតាមការកំណត់ ដែលបានព្រមព្រៀងគ្នាជាជំហានដំបូងឆ្ពោះទៅរកសន្តិភាពដ៏រឹងមាំ យូរអង្វែង និងជានិរន្តរ៍៕