មន្ត្រីជាន់ខ្ពស់អង្គការសហប្រជាជាតិ (UN) បាននិយាយកាលពីថ្ងៃពុធ (៨ តុលា) ថា ស្ថាប័នពិភពលោកមួយនេះនឹងកាត់បន្ថយដល់ទៅ ១ភាគ៤ នៃកងរក្សាសន្តិភាព ក្នុងប្រតិបត្តិការចំនួន៩ ជុំវិញពិភពលោក នៅប៉ុន្មានខែខាងមុខនេះ ដោយសារតែកង្វះខាតថវិកា ហើយក៏ដោយសារតែការផ្តល់មូលនិធិនាពេលអនាគតពីសហរដ្ឋអាមេរិក នៅតែមិនប្រាកដប្រជា។

មន្ត្រីជាន់ខ្ពស់របស់ UN ដែលសុំមិនបញ្ចេញឈ្មោះរូបនេះ បានប្រាប់សារព័ត៌មានរ៉យទ័រថា៖ "សរុបមក UN នឹងត្រូវធ្វើមាតុភូមិនិវត្តន៍... ប្រហែល ២៥% នៃកងរក្សាសន្តិភាព និងនគរបាលសរុបរបស់អង្គការ ព្រមទាំងយុទ្ធោបករណ៍របស់ពួកគេ ហើយបុគ្គលិកស៊ីវិលមួយចំនួនធំក្នុងបេសកកម្មក៏នឹងរងផលប៉ះពាល់ផងដែរ"។ មន្ត្រីដដែលនេះនិយាយថា នោះស្មើនឹងចំនួនទាហាន និងនគរបាលចន្លោះពី ១៣.០០០ ទៅ ១៤.០០០នាក់។

ទីក្រុងវ៉ាស៊ីនតោន គឺជាអ្នករួមចំណែកដ៏ធំបំផុតក្នុងការរក្សាសន្តិភាពអង្គការសហប្រជាជាតិ ដែលស្មើនឹងជាង ២៦% នៃមូលនិធិ ហើយបន្ទាប់មកគឺប្រទេសចិន ដែលចំណាយជិត ២៤% ។ គួរឱ្យដឹងថា ការផ្ដល់ថវិកាទាំងនេះមិនមែនជាការស្ម័គ្រចិត្តទេ។

មន្ត្រី UN ម្នាក់ទៀតបាននិយាយថា អាមេរិក បានជំពាក់ ១,៥ពាន់លានដុល្លារ រួចទៅហើយ មុនពេលឆ្នាំហិរញ្ញវត្ថុថ្មីចាប់ផ្តើមនៅថ្ងៃទី១ ខែកក្កដា។ ឥឡូវនេះ ទីក្រុងវ៉ាស៊ីនតោន ក៏ជំពាក់ប្រាក់បន្ថែមចំនួន ១,៣ពាន់លានដុល្លារទៀតផងដែរ ដោយតួលេខសរុបមានដល់ទៅជាង ២,៨ពាន់លានដុល្លារ។

ប្រធានាធិបតីអាមេរិក លោក Donald Trump កាលពីខែសីហា បានលុបចោលមូលនិធិកងរក្សាសន្តិភាពប្រមាណ ៨០០លានដុល្លារ សម្រាប់ឆ្នាំ២០២៤ និង ២០២៥ នេះបើយោងតាមសាររបស់រដ្ឋបាល Trump ទៅកាន់សភា។ ការិយាល័យថវិការបស់សេតវិមាន ក៏ស្នើឱ្យលុបចោលមូលនិធិសម្រាប់បេសកកម្មរក្សាសន្តិភាពរបស់ UN នៅឆ្នាំ២០២៦ផងដែរ ដោយលើកឡើងពីបរាជ័យនៃប្រតិបត្តិការទាំងនេះនៅប្រទេសម៉ាលី លីបង់ និងកុងហ្គោជាដើម៕