គ្រួសារចំណាប់ខ្មាំងបានប្រមូលផ្តុំគ្នានៅទីលានចតុរង្គចំណាប់ខ្មាំងក្នុងទីក្រុង Tel Aviv នៅព្រឹកព្រលឹមថ្ងៃព្រហស្បតិ៍ ៩ តុលានេះ បន្ទាប់ពីមានរបាយការណ៍អំពីកិច្ចព្រមព្រៀងដែលបានចុះហត្ថលេខារវាងអ៊ីស្រាអែល និងក្រុមហាម៉ាស ដើម្បីបញ្ចប់សង្រ្គាមនៅហ្កាហ្សា និងប្រគល់ចំណាប់ខ្មាំងអ៊ីស្រាអែលទាំងអស់ ទាំងរស់ និងស្លាប់ ត្រឡប់ទៅផ្ទះវិញ។ 

អ៊ីស្រាអែល និងក្រុមហាម៉ាស បានព្រមព្រៀងគ្នាកាលពីថ្ងៃពុធ ៨ តុលា ចំពោះដំណាក់កាលដំបូងនៃផែនការរបស់ប្រធានាធិបតីអាមេរិក Donald Trump សម្រាប់តំបន់ហ្កាហ្សា ជាកិច្ចព្រមព្រៀងបទឈប់បាញ់ និងចំណាប់ខ្មាំង ដែលអាចបើកផ្លូវដើម្បីបញ្ចប់សង្រ្គាមដ៏បង្ហូរឈាម អូសបន្លាយរយៈពេលពីរឆ្នាំ នៅមជ្ឈិមបូព៌ា។   

ចំណាប់ខ្មាំងជាង២៥០ នាក់ត្រូវបានចាប់ខ្លួននាំទៅកាន់តំបន់ហ្កាហ្សាកាលពីថ្ងៃទី ៧ ខែតុលាឆ្នាំ ២០២៣ នៅពេលក្រុមសកម្មប្រយុទ្ធដឹកនាំដោយហាម៉ាស បានបើកការវាយប្រហារឆ្លងព្រំដែន ដ៏គួរឱ្យភ្ញាក់ផ្អើល ជាអំពើហិង្សាដែលបានធ្វើឱ្យខូចមុខមាត់របស់អ៊ីស្រាអែល ជាអំណាចយោធា មួយនៅមជ្ឈិមបូព៌ា ដែលមិនអាចគ្រប់គ្រងស្ថានការណ៍បែបនេះបាន។

យោងតាមអាជ្ញាធរសុខាភិបាលអ៊ីស្រាអែល បានឲ្យដឹងថា ការវាយប្រហារនោះបានសម្លាប់មនុស្សប្រហែល ១.២០០ នាក់ភាគច្រើនជាជនស៊ីវិល ហើយហេតុការណ៍នោះបានក្លាយជាដើមចមបង្កឱ្យមានការសងសឹកយោធាដ៏ធំដែលបានសម្លាប់ប្រជាជនប៉ាឡេស្ទីនជាង៦៧.០០០នាក់ នៅក្នុងដែនដីហ្កាហ្សា៕