មេដឹកនាំពិភពលោក បានសម្ដែងក្ដីរីករាយ និងស្វាគមន៍យ៉ាងខ្លាំង បន្ទាប់ពីលោកប្រធានាធិបតីអាមេរិក Donald Trump ប្រកាសនៅថ្ងៃពុធ (៨ តុលា) ថា អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀងដំណាក់កាលទីមួយហើយ សម្រាប់បទឈប់បាញ់នៅតំបន់ហ្កាហ្សា និងការដោះលែងចំណាប់ថ្នូរ ក្រោមផែនការរបស់លោកក្នុងការបញ្ចប់សង្រ្គាមអាយុកាលពីរឆ្នាំនៅក្នុងតំបន់ប៉ាឡេស្ទីនមួយនោះ។

លោក Trump ផ្ទាល់បាននិយាយថា នេះជាថ្ងៃដ៏អស្ចារ្យមួយសម្រាប់ពិភពអារ៉ាប់ និងមូស្លីម អ៊ីស្រាអែល ប្រជាជាតិជុំវិញហ្កាហ្សាទាំងអស់ រួមទាំងអាមេរិកផងដែរ ហើយទីក្រុងវ៉ាស៊ីនតោនសូមថ្លែងអំណរគុណដល់អ្នកសម្របសម្រួលមកពីប្រទេសកាតា អេហ្ស៊ីប និងទួរគី ដែលបានធ្វើការជាមួយគ្នាដើម្បីធ្វើឱ្យព្រឹត្តិការណ៍ជាប្រវត្តិសាស្ត្រ និងមិនធ្លាប់មានពីមុនមកនេះកើតឡើង។

នាយករដ្ឋមន្រ្តីអ៊ីស្រាអែល លោក Benjamin Netanyahu បានអបអរនៅក្នុងសេចក្តីថ្លែងការណ៍មួយថា "នេះថ្ងៃដ៏ធំបំផុតសម្រាប់អ៊ីស្រាអែល"។ ក្រុមហាម៉ាស វិញក៏បានសម្ដែងការអរគុណចំពោះកិច្ចប្រឹងប្រែងពីអ្នកសម្រុះសម្រួល ជាពិសេសចំពោះលោកប្រធានាធិបតី Trump ក្នុងគោលបំណងបញ្ចប់សង្រ្គាមទាំងស្រុង។

អគ្គលេខាធិការអង្គការសហប្រជាជាតិ លោក Antonio Guterres បានស្វាគមន៍យ៉ាងរីករាយចំពោះការប្រកាសកិច្ចព្រមព្រៀងដំណាក់ទីមួយនេះដើម្បីធានាឱ្យបានបទឈប់បាញ់ និងការដោះលែងចំណាប់ថ្នូរនៅហ្កាហ្សា។ ជាមួយគ្នានេះ មេដឹកនាំអន្តរជាតិជាច្រើនរូបទៀតក៏ត្រេកអរចំពោះដំណឹងនេះ ហើយសម្ដែងក្ដីសង្ឃឹមថា ភាគីជម្លោះនឹងប្រកាន់ខ្ជាប់ខូវលក្ខខណ្ឌដែលបានព្រមព្រៀងដើម្បីសន្តិភាព៕