ប្រព័ន្ធផ្សព្វផ្សាយរដ្ឋ KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានលើកសរសើរពីដំណែលរបស់គណបក្សកាន់អំណាច និងបានអំពាវនាវឱ្យមានភក្ដីភាពជាថ្មីចំពោះសង្គមនិយម នៅក្នុងសុន្ទរកថាមួយមុនខួបលើកទី៨០ នៃការបង្កើតគណបក្សពលករកូរ៉េ (WPK) នៅថ្ងៃសុក្រ ទី១០ ខែតុលា ស្អែកនេះ។

នាយករដ្ឋមន្ត្រីចិន លោក Li Qiang និងគណៈប្រតិភូមកពីបក្សកាន់អំណាចរបស់រុស្ស៊ី ដឹកនាំដោយប្រធានបក្ស លោក Dmitry Medvedev ក៏ដូចជាប្រធានបក្សកុម្មុយនិស្តវៀតណាម លោក To Lam ស្ថិតក្នុងចំណោមឥស្សរជនបរទេស ដែលទៅចូលរួមប្រារព្ធពិធីនៅកូរ៉េខាងជើង ក្នុងសប្តាហ៍នេះ។

សេចក្ដីរាយការណ៍ពី KCNA បាននិយាយថា លោក គីម បានទៅទស្សនកិច្ចសារមន្ទីរស្ថាបនិកបក្សក្នុងទីក្រុងព្យុងយ៉ាង កាលពីថ្ងៃពុធ ជាមួយមន្ត្រីជាន់ខ្ពស់របស់បក្ស ហើយថ្លែងនូវអ្វីដែលប្រព័ន្ធផ្សព្វផ្សាយរដ្ឋនេះហៅថាជា "សុន្ទរកថាដ៏សំខាន់" ដើម្បីរំលឹកដល់ស្ថាបនិកគណបក្ស និងអ្នកនាំមុខនៃបដិវត្តន៍។

កូរ៉េខាងជើង ដែលមានអាវុធនុយក្លេអ៊ែរ មិនទាន់បញ្ជាក់ឡើយថា តើនឹងមានការដង្ហែក្បួនយោធាដើម្បីអបអរថ្ងៃឈប់សម្រាកក្នុងសប្តាហ៍នេះឬទេ។ ទីភ្នាក់ងារសារព័ត៌មានយ៉ុនហាប់ បានរាយការណ៍នៅសប្តាហ៍មុនថា មន្ត្រីកូរ៉េខាងត្បូង បាននិយាយថា មានសញ្ញាច្បាស់លាស់ដែលថា ទីក្រុងព្យុងយ៉ាងនឹងធ្វើព្យុហយាត្រាយោធាទ្រង់ទ្រាយធំក្នុងពិធីខួបនោះ៕