​សហរដ្ឋអាមេរិក៖ មន្ត្រី​យោធា​ជាន់ខ្ពស់​របស់​ទីក្រុង​វ៉ាស៊ីនតោន​និយាយ​ថា​ សហរដ្ឋអាមេរិក​នឹង​បញ្ជូន​នាវា​ពិឃាត​បំពាក់​ដោយ​មី​ស៊ី​ល​ប្រើ​ប្រព័ន្ធ​ទូរបញ្ជា និង​យន្តហោះ​ចម្បាំង​ជំនា​ន់​ទី​៥ ជាច្រើន​គ្រឿង​ទៅកាន់​អារ៉ាប់​រួម ក្រោយ​ការវាយប្រហារ​ដោយ​មី​ស៊ី​លពី​សំណាក់​ក្រុម​ឧទ្ទាម​ហួ​ទី​កាល​ពី​ពេល​ថ្មីៗ​នេះ​។​

នៅក្នុង​ការសន្ទនា​តាម​ទូរស័ព្ទ​កាលពី​ថ្ងៃ​អង្គារ រដ្ឋមន្ត្រី​ការពារជាតិអាមេរិកលោក Lloyd Austin បាន​ប្រាប់ព្រះអង្គម្ចាស់​ទីក្រុង Abu Dhabi គឺ​ព្រះអង្គម្ចាស់ Abu bin Zayed Al Nahyan ថា មន្ទីរ​បញ្ច​កោណនឹង​បញ្ជូន​នាវា​ពិឃាត​បំពាក់​ដោយ​មី​ស៊ី​ល​ប្រើ​ប្រព័ន្ធ​ទូរបញ្ជា USS Cole ទៅកាន់ដៃគូ​ជាមួយកងកម្លាំង​ជើង​ទឹក​អារ៉ាប់​រួម ​មុនពេល​បង្កើត​កំពង់ផែ​នៅក្នុង​ទីក្រុង Abu Dhabi​។ ​ប្រភពពី​មន្ទីរ​បញ្ច​កោណ​បាន​បន្ថែម​ថា អាមេរិក​​ក៏​នឹង​បញ្ជូន​ផងដែរនូវ​យន្តហោះ​ចម្បាំង​ជំនា​ន់ទី​៥ រួមទាំង​យន្តហោះ​ចម្បាំង​ប្រភេទ F-22 Raptor និង​យន្តហោះ​ចម្បាំង F-35 Lighting II ជាច្រើន​គ្រឿង​ទៅកាន់​អារ៉ាប់​រួម​ ដើម្បី​ជួយ​ទប់​ទល់នឹង​ការ​គំរាម​ថ្មីៗពី​សំណាក់​ក្រុម​ឧទ្ទាម​ហួ​ទី​នៅ​យេ​មែន​។ ក្រសួងការពារជាតិ​អារ៉ាប់​រួម​បាន​និយាយ​លើ​បណ្ដាញ​ធ្វី​ត​ធ័​រកាលពី​ល្ងាច​ថ្ងៃ​ពុធ​ថា អា​រ៉ា​ប់​រួម​បាន​ស្ទាក់ចាប់​ និង​កម្ទេចយាន​ដ្រូ​ន ៣​គ្រឿងដែល​បាន​ហោះចូល​ដែនអាកាស​របស់​នៅ​តំបន់​ឈូង​សមុទ្រ​មួយ​នេះ​។

សេចក្ដីប្រកាស​នេះ​កើតឡើង បន្ទាប់ពី​អារ៉ាប់​រួម​រង​ការវាយប្រហារ​ដោយ​មី​ស៊ី​ល​ជា​លើក​ទី​៣ ​នៅក្នុងរយៈពេល​ប៉ុន្មាន​សប្ដាហ៍​ថ្មីៗ​នេះ កាលពី​ថ្ងៃ​ច័ន្ទ​។​ ​កាលពី​ថ្ងៃ​ច័ន្ទ​ដើម​សប្ដាហ៍​នេះដែរ អ្នកនាំពាក្យ​ក្រុម​ឧទ្ទាម​ហួ​ទី​លោក Yehia Sarei បាន​ព្រមានថា អារ៉ាប់​រួម​ដែលជាសត្រូវ​របស់ខ្លួននៅតែ​មិនទាន់មាន​សុវត្ថិភាព​ទេ ដរាបណាឧបករណ៍​ផ្សេងៗរបស់​អ៊ីស្រាអែល​ ដែលជា​សត្រូវ​ខ្លួននៅតែមាន​នៅក្នុង​ទីក្រុង Abu Dhabi និង Dubai ដែលជា​ការបង្ហាញ​ពី​ការឈ្លានពាន ​ប្រឆាំងនឹង​កិច្ចព្រមព្រៀង​ប្រទេស​របស់​យើង​៕

អត្ថបទ៖ សុខមាន