អង្គការសប្បុរសធម៌រដ្ឋអារីហ្សូណា កំពុងត្រៀមទប់ទល់ដើម្បីជួយគ្រួសារកាន់តែច្រើនដែលត្រូវការជំនួយ ក្នុងពេលមានការបិទរដ្ឋាភិបាលសហរដ្ឋអាមេរិក។ អង្គការផ្តល់សេវាសង្គម St. Vincent de Paul នៅទីក្រុងហ្វីនីក(Phoenix) ផ្តល់ស្បៀងអាហារ ជំនួយផ្នែកជួល និងសេវាផ្សេងៗទៀតដល់សហគមន៍។ អ្នកដឹកនាំរបស់អង្គការនេះរំពឹងថាពួកគេអាចមើលឃើញការកើនឡើងនៃតម្រូវការសម្រាប់សេវារបស់ពួកគេនៅពេលដែលការបិទរដ្ឋាភិបាលនៅតែបន្ត។

លោក Danielle McMahon ប្រធានផ្នែកប្រតិបត្តិការនៅអង្គការផ្តល់សេវាសង្គម St. Vincent de Paul បាននិយាយថា «នៅពេលណាដែលនរណាម្នាក់មិនបានទទួលប្រាក់ឈ្នួលភ្លាមៗ ដែលពួកគេរំពឹងសម្រាប់ប្រើប្រាស់ក្នុងលំនៅឋាននិងជីវភាពរស់នៅ វាពិតជាអាចបង្កឱ្យមានភាពតានតឹងជាច្រើនដល់ពួកគេនិងក្រុមគ្រួសារ ហើយវាអាចធ្វើឱ្យពួកគេត្រូវការជំនួយពីកន្លែងនានាដូចជា អង្គការ St. Vincent de Paul ដើម្បីទទួលបានស្បៀងអាហារដែលត្រូវការសម្រាប់ចិញ្ចឹមគ្រួសារ»។ ក្នុងសប្តាហ៍នេះ អ្នកស្ម័គ្រចិត្ត និងបុគ្គលិក កំពុងរៀបចំស្បៀង និងប្រមូលអំណោយអាហារ និងទឹកនៅក្នុងឃ្លាំងអាហារ។

បុគ្គលិកសហព័ន្ធរាប់ពាន់នាក់ ត្រូវបានឲ្យឈប់សម្រាកពីការងារនៅពេលដែលមានការបិទរដ្ឋាភិបាលកាលពីថ្ងៃទី ១ ខែតុលា បន្ទាប់ពីសភាសហរដ្ឋអាមេរិក និងលោក Trump បរាជ័យមិនបានឈានដល់កិច្ចព្រមព្រៀងស្តីពីការចំណាយរបស់រដ្ឋាភិបាល។ សេវានានានៅទូទាំងរដ្ឋាភិបាលត្រូវបានបង្អាក់ដោយសារតែការបិទរដ្ឋាភិបាល ហើយបុគ្គលិករដ្ឋាភិបាលរាប់ពាន់នាក់ត្រូវបានឲ្យឈប់សម្រាកពីការងារ។ បុគ្គលិកសហព័ន្ធដែលត្រូវបានឲ្យឈប់សម្រាក និងនិយោជិតសហព័ន្ធសំខាន់ៗនៅតែធ្វើការនឹងមិនទទួលបានប្រាក់ឈ្នួលទេ រហូតដល់សមាជិកសភាអាចឈានដល់កិច្ចព្រមព្រៀង និងបញ្ចប់ការបិទរដ្ឋាភិបាល។ និយោជិតទាំងនោះ ត្រូវបានគេរំពឹងថានឹងទទួលបានប្រាក់ឈ្នួលត្រឡប់មកវិញបន្ទាប់ពីការបិទរដ្ឋាភិបាល បញ្ចប់។