ប្រធានាធិបតីប្រទេសបូលីវី លោក លូអ៊ីស អាស(Luis Arce) កាលពីថ្ងៃពុធ ទី៨ តុលា បានចោទប្រកាន់សមាជិកសភាថា បានរៀបចំ «រដ្ឋប្រហារប្រឆាំងលទ្ធិប្រជាធិបតេយ្យ» តាមរយៈការប៉ុនប៉ងដើម្បីផ្អាកការបោះឆ្នោតប្រធានាធិបតីជុំទី២នៅថ្ងៃទី១៩ ខែតុលា ដែលបង្កើនភាពតានតឹងផ្នែកនយោបាយនៅមុនការបោះឆ្នោតជុំទីពីរដែលមិនធ្លាប់មានពីមុនមករបស់ប្រទេសនេះ។

លោក Arce បាននិយាយនៅក្នុងសេចក្តីថ្លែងការណ៍មួយទៅកាន់ប្រព័ន្ធផ្សព្វផ្សាយថា «យើងចង់ផ្តល់ព័ត៌មានដល់ប្រជាជនបូលីវី និងថ្កោលទោសយ៉ាងខ្លាំងចំពោះសហគមន៍អន្តរជាតិថា រដ្ឋប្រហារប្រឆាំងលទ្ធិប្រជាធិបតេយ្យកំពុងដំណើរការនៅក្នុងសភានីតិបញ្ញត្តិរដ្ឋបូលីវី ដោយសមាជិកសភា និងព្រឹទ្ធសមាជិកមួយចំនួន គិតតែពីផលប្រយោជន៍ផ្ទាល់ខ្លួន និងពុំមែនប្រជាជនឡើយ»។

សេចក្តីស្នើច្បាប់ដ៏ចម្រូងចម្រាសមួយ ត្រូវបានស្នើឡើងនៅក្នុងខែកញ្ញាដោយសមាជិកព្រឹទ្ធសភា លោក Pedro Benjamín Vargas ជាសមាជិកនៃគណបក្សកំពុងកាន់អំណាច ចលនាឆ្ពោះទៅរកសង្គមនិយម (MAS) ដែលគាំទ្រប្រធានព្រឹទ្ធសភា និងជាអតីតបេក្ខជនប្រធានាធិបតី លោក Andronico Rodríguez។ លោក Arce ក៏បានរិះគន់ចំណាត់ការដើម្បីបង្កើតគណៈកម្មការនីតិប្បញ្ញត្តិក្នុងការស៊ើបអង្កេតការក្លែងបន្លំដែលត្រូវបានចោទប្រកាន់នៅក្នុងការបោះឆ្នោតជុំទីមួយដែលបានធ្វើឡើងកាលពីថ្ងៃទី១៧ ខែសីហាដោយចាត់ទុកវាថាជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយដើម្បីធ្វើឱ្យអន្តរាយដល់ដំណើរការលទ្ធិប្រជាធិបតេយ្យ។