អ៊ីស្រាអែលបានចេញការព្រមានដល់ប្រជាជនប៉ាឡេស្ទីននៅតំបន់ហ្កាហ្សា កុំឲ្យវិលត្រលប់ទៅផ្នែកខាងជើងនៃដែនដីនេះវិញ ដោយបញ្ជាក់ថា «តំបន់ភាគខាងជើង Wadi Gaza នៅតែត្រូវបានចាត់ទុកថា ជាតំបន់ប្រយុទ្ធដ៏គ្រោះថ្នាក់»។

តាមរយៈការបង្ហោះនៅលើបណ្ដាញសង្គម X អ្នកនាំពាក្យរបស់យោធាអ៊ីស្រាអែល លោក Avichy Adraee បានឲ្យដឹងថា៖ «កងកម្លាំង IDF (កងកម្លាំងការពារជាតិអ៊ីស្រាអែល) នៅតែឡោមព័ទ្ធទីក្រុងហ្កាហ្សា ជាកន្លែងដែលការវិលត្រលប់ទៅទីនោះវិញ គឺជាការប្រឈមនឹងគ្រោះថ្នាក់ខ្លាំងណាស់»។

លោកបានបន្ថែមថា៖ «ដើម្បីសុវត្ថិភាពផ្ទាល់ខ្លួនរបស់អ្នកទាំងអស់គ្នា សូមចៀសវាងការវិលត្រលប់ទៅភាគខាងជើង ឬចូលទៅជិតតំបន់ដែលកងកម្លាំង IDF ឈរជើង និងប្រតិបត្តិការគ្រប់ទីកន្លែង នៅក្នុងដែនដីនេះ ក្នុងនោះរួមទាំងភាគខាងត្បូង និងភាគខាងកើតនៃដែនដីនេះផងដែរ រហូតដល់មានការចេញនូវការណែនាំផ្លូវការ»។

ការព្រមានរបស់លោកកើតឡើងស្របពេលដែលអ៊ីស្រាអែល និងក្រុមហាម៉ាសគ្រោងនឹងចុះហត្ថលេខាលើកិច្ចព្រមព្រៀងបទឈប់បាញ់ នៅតំបន់ហ្កាហ្សា នាថ្ងៃព្រហស្បតិ៍ (ទី៩ ខែតុលា) នេះ ជាអ្វីដែលអាចនាំឲ្យមានការដោះលែងចំណាប់ថ្នូរនៅសល់ ក្នុងរយៈពេលប៉ុន្មានថ្ងៃខាងមុខ អ្នកទោសប៉ាឡេស្ទីនរាប់រយនាក់មានសេរីភាព ក៏ដូចជាការបង្កើនជំនួយទៅកាន់តំបន់ហ្កាហ្សា បន្ទាប់ពីសង្រ្គាមផ្ទុះឡើងអស់រយៈពេលជាង ២ឆ្នាំ។

យ៉ាងណាក្ដី ទោះបីជាមានការប្រកាសពីបទឈប់បាញ់ក៏ដោយ ក៏ស្ថាប័នការពារជនស៊ីវិល នៅក្នុងដែនដីនេះ បានរាយការណ៍ពីការវាយប្រហាររបស់អ៊ីស្រាអែលជាច្រើនដងលើតំបន់ហ្កាហ្សាស្ទ្រីប នាព្រឹកថ្ងៃព្រហស្បតិ៍នេះ៕