ក្រុមហាម៉ាស នៅព្រហស្បតិ៍ (ទី៩ ខែតុលា) នេះ បានប្រកាសថា ខ្លួនបានឈានដល់កិច្ចព្រមព្រៀង ដើម្បីបញ្ចប់សង្គ្រាមនៅតំបន់ហ្កាហ្សា បន្ទាប់ពីមានការពិភាក្សាលើសំណើរបស់ប្រធានាធិបតីសហរដ្ឋអាមេរិក លោក Donald Trump។

កិច្ចព្រមព្រៀងដែលសម្រេចបានបន្ទាប់ពីមានកិច្ចចរចានៅប្រទេសអេហ្ស៊ីប កំណត់លក្ខខណ្ឌឲ្យបញ្ចប់សង្រ្គាម ការដកទ័ពអ៊ីស្រាអែលចេញពីតំបន់ហ្កាហ្សា លំហូរជំនួយចូលទៅក្នុងតំបន់ហ្កាហ្សាស្ទ្រីប ហើយនិងការដោះដូរអ្នកទោស រវាងក្រុមហាម៉ាស និងអ៊ីស្រាអែល។

តែយ៉ាងណាក្ដី នៅក្នុងសេចក្តីថ្លែងការណ៍នោះ ក្រុមហាម៉ាសបានអំពាវនាវឲ្យលោក Trump និងភាគីអារ៉ាប់ ឥស្លាម និងអន្តរជាតិនានា ជំរុញឲ្យអ៊ីស្រាអែលអនុវត្តកាតព្វកិច្ចរបស់ខ្លួនយ៉ាងពេញលេញ ដោយដាក់សម្ពាធកុំឲ្យរដ្ឋាភិបាលអ៊ីស្រាអែល «គេចវេះ ឬពន្យារពេលការអនុវត្តនូវអ្វីដែលបានព្រមព្រៀងគ្នា»។

ជាមួយគ្នានេះ ក្រុមនេះបានសម្តែងនូវការកោតសរសើររបស់ខ្លួន ចំពោះកិច្ចប្រឹងប្រែងរបស់អ្នកសម្រុះសម្រួល នៅក្នុងប្រទេសកាតា អេហ្ស៊ីប និងទួរគី ហើយថែមទាំងបានពោលសរសើរដល់កិច្ចប្រឹងប្រែងរបស់លោក Trump ដើម្បី «បញ្ចប់សង្រ្គាមម្តងហើយម្តងទៀត»។

គួរបញ្ជាក់ថា នៅព្រឹកថ្ងៃព្រហស្បតិ៍នេះ លោកប្រធានាធិបតីអាមេរិកបានប្រកាសថា អ៊ីស្រាអែល និងក្រុមហាម៉ាសបានចុះហត្ថលេខាលើដំណាក់កាលទី១ នៃកិច្ចព្រមព្រៀងតំបន់ហ្កាហ្សា។ លោក Trump បានសរសេរថា៖ «ខ្ញុំមានមោទនភាពក្នុងការប្រកាសថា អ៊ីស្រាអែល និងក្រុមហាម៉ាសបានចុះហត្ថលេខាលើដំណាក់កាលដំបូងនៃផែនការសន្តិភាពរបស់យើងហើយ។

លោកបានសរសេរបន្ថែមថា៖ «នេះមានន័យថា អ្នកទោសទាំងអស់នឹងត្រូវបានដោះលែងក្នុងពេលឆាប់ៗនេះ ហើយអ៊ីស្រាអែលនឹងដកកងកម្លាំងរបស់ខ្លួនទៅកាន់បន្ទាត់ដែលបានព្រមព្រៀងគ្នា ដែលជាជំហានដំបូងឆ្ពោះទៅរកសន្តិភាពដ៏រឹងមាំ យូរអង្វែង និងនិរន្តរភាព»៕