មេដឹកនាំថ្មីរបស់គណបក្សកាន់អំណាចជប៉ុន លោកស្រី Sanae Takaichi មិនទាន់ឈានដល់កិច្ចព្រមព្រៀងនៅឡើយទេ ជាមួយដៃគូចម្រុះជាយូរមកហើយរបស់បក្ស គឺគណបក្ស Komeito ជុំវិញការបន្តសម្ព័ន្ធភាពរបស់ពួកគេ ជាការពន្យារពេលដែលបង្ហាញនូវបញ្ហាប្រឈម សម្រាប់លោកស្រី ក្នុងការបង្កើតនូវរដ្ឋបាលមួយប្រកបដោយស្ថិរភាព។

ទោះបីជាមានការគាំទ្រពីគណបក្ស Komeito ក៏ដោយ ក៏គណបក្សប្រជាធិបតេយ្យសេរីនិយម (LDP) នៅតែខ្វះសំឡេងភាគច្រើនក្នុងសភាទាំង២។ យ៉ាងណាក្ដី វាមានភាពចាំបាច់ណាស់ សម្រាប់លោកស្រី Takaichi ក្នុងការធ្វើឲ្យសម្ព័ន្ធភាពមួយនេះបន្តការគាំទ្ររបស់ខ្លួន មុនពេលលោកស្រីធ្វើនូវកិច្ចព្រមព្រៀងជាមួយភាគីផ្សេងទៀត ក្នុងគោលបំណងទទួលបានចំនួនដែលត្រូវការ ដើម្បីអនុម័តកញ្ចប់ថវិកា និងជំរុញគោលនយោបាយ។

បើទោះបីជាលទ្ធផលដែលអាចកើតមានបំផុត គឺថា ភាគីទាំង២ នឹងឈានដល់ការព្រមព្រៀងគ្នា នៅប៉ុន្មានថ្ងៃខាងមុខនេះក៏ដោយ ក៏ការពន្យារពេលនេះបង្ហាញពីកម្រិតនៃការរារែកដែលគណបក្ស Komeito មាន ជុំវិញទស្សនៈរបស់ក្រុមស្តាំនិយម និងការឆ្លើយតបរបស់លោកស្រី Takaichi ចំពោះរឿងអាស្រូវផ្តល់មូលនិធិនៅក្នុងបក្ស LDP។

សញ្ញានៃភាពមិនស្រួលនោះ ត្រូវបានបង្ហាញនៅក្នុងការអត្ថាធិប្បាយដែលត្រូវបានចាក់ផ្សាយកាលពីថ្ងៃពុធ (ទី៨ ខែតុលា) ដោយប្រធានបក្ស Komeito លោក Tetsuo Saito បានប្រាប់ថា គណបក្សនឹងមិនបោះឆ្នោតឲ្យលោកស្រី Takaichi នៅក្នុងការបោះឆ្នោតសភា ដើម្បីសម្រេចតែងតាំងនាយករដ្ឋមន្ត្រីឡើយ ប្រសិនបើកិច្ចព្រមព្រៀងបង្កើតរដ្ឋាភិបាលចម្រុះមិនដំណើរការ៕