នាយករដ្ឋមន្ត្រីម៉ាឡេស៊ី លោក Anwar Ibrahim បានឡើងថ្លែងសុន្ទរកថា នៅកន្លែងជួបជុំគាំទ្រប៉ាឡេស្ទីន កាលពីយប់ថ្ងៃពុធ (ទី៨ ខែតុលា) ដោយនៅទីនោះលោកបានរិះគន់ខ្លាំងៗ ចំពោះសកម្មភាពរបស់អ៊ីស្រាអែល នៅតំបន់ហ្កាហ្សា ជាការកត់សម្គាល់ដែលកើតឡើងត្រឹមតែប៉ុន្មានសប្តាហ៍ប៉ុណ្ណោះ មុនពេលលោកធ្វើជាម្ចាស់ផ្ទះទទួលសម្ព័ន្ធមិត្តដ៏សំខាន់របស់អ៊ីស្រាអែល គឺប្រធានាធិបតីអាមេរិក លោក Donald Trump។

ដោយនិយាយទៅកាន់មនុស្សរាប់ពាន់នាក់ដែលបានប្រមូលផ្តុំគ្នា នៅក្នុងរដ្ឋធានី Kuala Lumpur លោក Datuk Seri Anwar បានប្រាប់ថា៖ «អ្វីដែលយើងកំពុងតែប្រឆាំង គឺប្រទេសដ៏ធំមួយ គឺអ៊ីស្រាអែល។ ប៉ុន្តែយើងមិនភ័យខ្លាច ឬបារម្ភអ្វីឡើយ សូម្បីតែបន្តិច»។

ជម្លោះនៅតំបន់ហ្កាហ្សា ដែលអ៊ីស្រាអែលបាននិងកំពុងប្រយុទ្ធជាមួយក្រុមហាម៉ាសអស់រយៈពេល ២ឆ្នាំមកហើយនោះ បានគំរាមកំហែងធ្វើឲ្យស្មុគស្មាញដល់ការចូលរួមដែលបានគ្រោងទុករបស់លោក Trump នៅក្នុងកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ពីថ្ងៃទី២៦ ដល់ថ្ងៃទី២៨ ខែតុលានេះ។

គណបក្សប្រឆាំងដ៏សំខាន់របស់ម៉ាឡេស៊ី កំពុងទាមទារឲ្យមានការជួបប្រជុំជាមួយមេដឹកនាំសហរដ្ឋអាមេរិក ដើម្បីប្រឆាំងនឹងសកម្មភាពរបស់អ៊ីស្រាអែល ហើយគ្រោងនឹងធ្វើបាតុកម្មជាសាធារណៈ ក្នុងអំឡុងពេលមានដំណើរទស្សនកិច្ចរបស់លោក។

យ៉ាងណាក្ដី លោក Anwar បានការពារការសម្រេចចិត្តរបស់លោក ក្នុងការធ្វើជាម្ចាស់ផ្ទះទទួលលោក Trump ហើយបានបញ្ជាក់ថា លោកមិនមានគម្រោងលុបចោលការអញ្ជើញនោះទេ។ លោកបានប្រាប់ថា៖ «ខ្ញុំមិនចុះញ៉មឡើយ។ ខ្ញុំចង់ចរចា»។

គួរបញ្ជាក់ថា នាយករដ្ឋមន្ត្រីម៉ាឡេស៊ី គឺជាអ្នករិះគន់អ៊ីស្រាអែលជាយូរមកហើយ ប៉ុន្តែប្រឈមនឹងការសាកល្បងដ៏លំបាកស្មុគស្មាញមួយ ជាមួយនឹងដំណើរទស្សនកិច្ចរបស់លោក Trump៕