នាយករដ្ឋមន្ត្រីឥណ្ឌា លោក Narendra Modi និងសមភាគីអង់គ្លេសរបស់លោក គឺលោក Keir Starmer នៅថ្ងៃព្រហស្បតិ៍ (ទី៩ ខែតុលា) នេះ បានពោលសរសើរដល់សក្តានុពលនៃកិច្ចព្រមព្រៀងពាណិជ្ជកម្មដែលទើបមានអាយុកាលប៉ុន្មានខែរបស់ប្រទេសទាំង២ ដើម្បីធ្វើឲ្យទំនាក់ទំនងពាណិជ្ជកម្មប្រសើរឡើង ខណៈដែលទីក្រុងឡុងដ្រ៍ បានបង្ហាញពីការវិនិយោគរបស់ឥណ្ឌាបន្ថែមទៀត នៅចក្រភពអង់គ្លេស។

គួរបញ្ជាក់ថា លោក Starmer កំពុងស្ថិតនៅឯរដ្ឋធានីហិរញ្ញវត្ថុ Mumbai ដែលជាទស្សនកិច្ចរយៈពេល ២ថ្ងៃ នៅប្រទេសឥណ្ឌា ដោយមានការរួមដំណើរដោយថ្នាក់ដឹកនាំជាង ១០០នាក់ មកពីផ្នែកធុរកិច្ច វប្បធម៌ និងសាកលវិទ្យាល័យ ខណៈដែលលោកប្រញាប់ប្រញាល់ធ្វើយ៉ាងណាទាញយកប្រយោជន៍ពីកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខាកាលពីខែកក្កដា។

កិច្ចព្រមព្រៀងនោះបានយល់ព្រមកាត់បន្ថយអត្រាពន្ធលើទំនិញនានា រាប់ចាប់ពីវាយនភណ្ឌ រហូតដល់ស្រាវីស្គី និងរថយន្ត ហើយអនុញ្ញាតឲ្យមានការចូលទីផ្សារកាន់តែច្រើនឡើង សម្រាប់បណ្ដាក្រុមហ៊ុន នៅក្នុងប្រទេសដែលមានសេដ្ឋកិច្ចធំជាងគេបំផុតទី៥ និងទី៦ របស់ពិភពលោក ក្នុងគោលបំណងជំរុញពាណិជ្ជកម្មទ្វេភាគីបន្ថែមទៀតឲ្យដល់កម្រិត ២៥,៥ពាន់លានផោន (៣៤ពាន់លានដុល្លារ) នៅឆ្នាំ២០៤០។

បន្ទាប់ពីមានកិច្ចពិភាក្សាជាមួយនាយករដ្ឋមន្រ្តីអង់គ្លេស លោក Modi បានលើកឡើងថា ដំណើរទស្សនកិច្ចរបស់លោក Starmer អមដោយគណៈប្រតិភូធុរកិច្ចធំបំផុតមិនធ្លាប់មាន «ឆ្លុះបញ្ចាំងពីសន្ទុះថ្មី និងចក្ខុវិស័យដ៏ទូលំទូលាយ» ក្នុងភាពជាដៃគូ។

លោក Modi បាននិយាយជាភាសាហិណ្ឌូថា៖ «ថាមភាពរបស់ឥណ្ឌា និងភាពជំនាញរបស់ចក្រភពអង់គ្លេស រួមគ្នាបង្កើតបាននូវកម្លាំងដ៏វិសេសឯកមួយ។ ភាពជាដៃគូរបស់យើងត្រូវបានបង្កើតឡើងតាមរយៈការជឿទុកចិត្ត។ វាគឺជាការបញ្ជាក់យ៉ាងច្បាស់លាស់នូវការប្តេជ្ញាចិត្តរួមគ្នារបស់យើង ដើម្បីកសាងអនាគតដ៏ភ្លឺស្វាង សម្រាប់ប្រជាជននៃប្រទេសរបស់យើងទាំង២»។

ចំណែកលោក Starmer បានបញ្ជាក់យ៉ាងខ្លីថា ការផ្តោតអារម្មណ៍នៃដំណើរទស្សនកិច្ចរបស់លោក គឺទាក់ទងនឹងការពង្រឹងសក្តានុពលនៃកិច្ចព្រមព្រៀងពាណិជ្ជកម្ម៕