ក្រុមប្រឹក្សាជនភៀសខ្លួនន័រវែស (NFC) ដែលជាក្រុមជំនួយឯករាជ្យដ៏ធំបំផុតមួយកំពុងធ្វើការនៅតំបន់ហ្កាហ្សា បានលើកឡើងថា ផែនការរបស់លោកប្រធានាធិបតី Donald Trump ក្នុងការបង្កើនជំនួយដល់ប្រជាជនដែលអត់ឃ្លានជាផ្នែកនៃបទឈប់បាញ់នោះ នឹងបរាជ័យ ប្រសិនបើក្រុមជំនួយទាំងអស់ មិនអាចចាប់ផ្ដើមប្រតិបត្តិការឡើងវិញបាននោះទេ។

ក្នុងបទសម្ភាសន៍មួយតាមតំណភ្ជាប់វីដេអូពីទីក្រុង Oslo ប្រទេសន័រវែស ប្រធាន NRC លោក Jan Egeland បានប្រាប់ទីភ្នាក់ងារសារព័ត៌មាន Reuters ថា៖ «ភាពអស់សង្ឃឹម គឺមានកម្រិតកាន់តែខ្ពស់ឡើងៗ ហើយការហត់នឿយទាំងផ្លូវកាយ និងចិត្ត គឺមានទំហំធំធេងជាងអ្វីដែលនរណាម្នាក់អាចស្រមៃបាន នៅខាងក្នុងតំបន់ហ្កាហ្សា។ វាមិនគ្រប់គ្រាន់នោះឡើយ ដែលមានទីភ្នាក់ងារអង្គការសហប្រជាជាតិ និងអង្គការក្រៅរដ្ឋាភិបាលត្រឹមមួយចំនួនតូចនោះ»។

លោក Egeland បានសង្កត់ធ្ងន់ថា៖ «បើមិនដូច្នោះទេ ផែនការសន្តិភាពរបស់លោក Trump នឹងមិនទទួលបានជោគជ័យឡើយ។ យើងមិនមានពេល ដើម្បីដោះស្រាយឧបសគ្គនានា ពាក់ព័ន្ធនឹងការិយាធិបតេយ្យបន្ថែមទៀតឡើយ»។

គួរបញ្ជាក់ថា ទាំងប្រជាជនអ៊ីស្រាអែល និងប៉ាឡេស្ទីន នៅថ្ងៃព្រហស្បតិ៍ (ទី៩ ខែតុលា) បានពើបប្រទះនឹងភាពរីករាយ បន្ទាប់ពីលោក Trump បានប្រកាសថា កិច្ចព្រមព្រៀងបទឈប់បាញ់ និងចំណាប់ថ្នូរ ត្រូវបានឈានដល់ហើយ ក្រោមដំណាក់កាលដំបូងនៃផែនការរបស់លោក ដើម្បីបញ្ចប់សង្រ្គាមរយៈពេល ២ឆ្នាំ នៅតំបន់ហ្កាហ្សា៕