ស្ថាប័នផ្តល់រង្វាន់ណូបែល នៅថ្ងៃព្រហស្បតិ៍ (ទី៩ ខែតុលា) នេះ បានប្រកាសថា អ្នកនិពន្ធជនជាតិហុងគ្រី លោក Laszlo Krasznahorkai គឺជាម្ចាស់ជ័យលាភីផ្នែកអក្សរសាស្ត្រ សម្រាប់ឆ្នាំ២០២៥។

លេខាធិការអចិន្ត្រៃយ៍នៃបណ្ឌិតសភាស៊ុយអែត លោក Mats Malm បាននិយាយថា៖ «រង្វាន់ណូបែលផ្នែកអក្សរសាស្ត្រ សម្រាប់ឆ្នាំ២០២៥ ត្រូវបានប្រគល់ជូនដល់អ្នកនិពន្ធជនជាតិហុងគ្រី លោក László Krasznahorkai សម្រាប់ស្នាដៃនិពន្ធដ៏គួរឲ្យទាក់ទាញ និងហួសវិស័យរបស់លោក ដែលក្នុងអំឡុងពេលពោរពេញទៅដោយភាពវឹកវរ និងចលាចលនេះ បញ្ជាក់ឡើងវិញនូវអំណាចនៃសិល្បៈ»។

អ្នកឈ្នះផ្នែកអក្សរសាស្ត្រកន្លងមកនៃរង្វាន់ដែលគិតជាទឹកប្រាក់ គឺចំនួន ១១លានក្រូណាស៊ុយអែត (១,២លានដុល្លារ) រួមមានកវី និងជាអ្នកនិពន្ធជនជាតិបារាំង លោក Sully Prudhomme ដែលបានទទួលរង្វាន់នេះដំបូងគេ អ្នកនិពន្ធប្រលោមលោក និងរឿងខ្លីជនជាតិអាមេរិក លោក William Faulkner ក្នុងឆ្នាំ១៩៤៩ នាយករដ្ឋមន្ត្រីសម័យសង្គ្រាមលោកលើកទី២ របស់ចក្រភពអង់គ្លេស លោក Winston Churchill ក្នុងឆ្នាំ១៩៥៣ អ្នកនិពន្ធសញ្ជាតិទួរគី លោក Orhan Pamuk ក្នុងឆ្នាំ២០០៦ និងអ្នកនិពន្ធសៀវភៅជនជាតិន័រវែស លោក Jon Fosse នៅឆ្នាំ២០២៣។

កាលពីឆ្នាំមុន រង្វាន់នេះ ត្រូវបានប្រគល់ទៅឲ្យអ្នកនិពន្ធជនជាតិកូរ៉េខាងត្បូង លោកស្រី Han Kang ដែលបានក្លាយជាស្ត្រីទី១៨ ដោយអ្នកទី១ គឺអ្នកនិពន្ធស៊ុយអែត លោកស្រី Selma Lagerlof ក្នុងឆ្នាំ១៩០៩ និងជាជនជាតិកូរ៉េខាងត្បូងដំបូងគេដែលទទួលបានពានរង្វាន់នេះ។

គួរំលឹកថា ដោយត្រូវបានបង្កើតឡើងដោយឆន្ទៈរបស់អ្នករកឃើញថាមពលឌីណាមិក និងជាអ្នកជំនួញជនជាតិស៊ុយអែត គឺលោក Alfred Nobel ការផ្ដល់រង្វាន់ សម្រាប់ស្នាដៃ នៅក្នុងផ្នែកអក្សរសាស្ត្រ វិទ្យាសាស្ត្រ និងសន្តិភាព ត្រូវបានចាប់ផ្ដើមកកើតឡើង តាំងពីឆ្នាំ១៩០១៕