ប្រធានគណៈកម្មការអឺរ៉ុប លោកស្រី Ursula von der Leyen បានរួចខ្លួនដោយស្រួលៗ ពីការប៉ុនប៉ងចំនួន ២ ដើម្បីទម្លាក់លោកស្រីចេញពីតំណែង នៅពេលដែលសភាអឺរ៉ុប បានបោះឆ្នោតច្រានចោលញត្តិដកសេចក្ដីទុកចិត្តពីក្រុមស្ដាំនិយម និងឆ្វេងនិយមជ្រុល នៅថ្ងៃព្រហស្បតិ៍ (ទី៩ ខែតុលា) នេះ។

សមាជិកសភាសហភាពអឺរ៉ុប (EU) បានច្រានចោលញត្តិសម្ដែងសេចក្ដីមិនទុកចិត្តចំនួន ២ ដោយសមាជិកចំនួន ៣៧៨នាក់នៃសភាដែលមានចំនួនសរុប ៧២០នាក់ បង្ហាញការគាំទ្រ ចំពោះលោកស្រី von der Leyen និងក្រុមស្នងការរបស់លោកស្រី នៅក្នុងការបោះឆ្នោតលើកទី១ ហើយ ៣៨៣នាក់ នៅក្នុងការបោះឆ្នោតលើកទី២។

លទ្ធផលនេះគឺមានភាពល្អប្រសើរបន្តិច សម្រាប់នាយកប្រតិបត្តិ EU ជាងកម្រិតកាលពីខែកក្កដា ជាពេលដែលសមាជិកសភាចំនួន ៣៦០នាក់ បានបោះឆ្នោតប្រឆាំងនឹងញត្តិដែលដាក់ដោយសមាជិកសភាស្តាំនិយមជ្រុលភាគច្រើន ទោះបីជាចំនួននេះ គឺទាបជាង ៤០១សំឡេង ដែលលោកស្រី von der Leyen ទទួលបានកាលពីខែកក្កដា ឆ្នាំ២០២៤ នៅពេលដែលបានជាប់ឆ្នោតម្ដងទៀតជាប្រធានគណៈកម្មការក៏ដោយ។

តែយ៉ាងណាក្ដី ទោះបីជាញត្តិបន្ទោស ឬបង្ហាញសេចក្ដីមិនទុកចិត្ត ស្ទើរតែគ្មានឱកាសទទួលបានសំឡេងភាគច្រើន ២ភាគ៣ ដែលត្រូវការ ដើម្បីដកតំណែងលោកស្រីក៏ដោយ ក៏សមាជិកសភាមួយចំនួន បាននិយាយថា ពួកគេអាចបង្ហាញភាពមិនសប្បាយចិត្តទូទៅបន្ថែមទៀត ចំពោះការដឹកនាំរបស់លោកស្រី និងធ្វើឲ្យសភា EU មានអស្ថិរភាព ដែលការគាំទ្ររបស់ពួកគេ គឺតម្រូវឲ្យមាន ដើម្បីអនុម័តច្បាប់៕