រដ្ឋមន្ត្រីហិរញ្ញវត្ថុស្តាំនិយមជ្រុលរបស់អ៊ីស្រាអែល លោក Bezalel Smotrich នៅថ្ងៃព្រហស្បតិ៍ (ទី៩ ខែតុលា) នេះ បានសម្តែងក្តីរីករាយ ចំពោះការវិលត្រលប់មកវិញរបស់ចំណាប់ថ្នូរទាំងអស់ ប៉ុន្តែបានទទូចថាសង្រ្គាមមិនត្រូវបញ្ចប់នៅពេលដែលពួកគេត្រលប់ទៅដល់ផ្ទះសម្បែងវិញនោះទេ។

លោក Smotrich បាននិយាយថា៖ «ភ្លាមៗបន្ទាប់ពីអ្នកត្រូវបានចាប់ពង្រត់ វិលត្រលប់ទៅផ្ទះសម្បែងរបស់ពួកគេវិញ រដ្ឋអ៊ីស្រាអែលត្រូវតែបន្តប្រឹងប្រែងឲ្យខ្លាំងក្លាបន្ថែមទៀត ដើម្បីកម្ចាត់ក្រុមហាម៉ាសឲ្យបានទាំងស្រុង និងធ្វើឲ្យគ្មានកម្លាំងយោធាសូម្បីបន្តិច នៅតំបន់ហ្កាហ្សា ដើម្បីកុំឲ្យមានការគំរាមកំហែងដល់អ៊ីស្រាអែលតទៅទៀត»។

រដ្ឋមន្ត្រីរូបនេះបានបន្តទៀតថា លោកប្រឆាំងនឹងកិច្ចព្រមព្រៀងបទឈប់បាញ់ នៅតំបន់ហ្កាហ្សា ដែលបានឈានដល់ រវាងអ៊ីស្រាអែល និងក្រុមហាម៉ាស នៅថ្ងៃព្រហស្បតិ៍នេះ ដោយទទូចថា លោកនឹងបោះឆ្នោតប្រឆាំងនឹងវា។ តែយ៉ាងណាក្ដី លោកមិនបានគំរាមលាលែងពីរដ្ឋាភិបាលរបស់លោកនាយករដ្ឋមន្ត្រី Benjamin Netanyahu នោះឡើយ។

លោក Smotrich បានរៀបរាប់នៅលើបណ្ដាញសង្គម X ថា៖ «មានការភ័យខ្លាចយ៉ាងខ្លាំង ចំពោះផលវិបាកនៃការដោះលែងមេដឹកនាំភេរវករជំនាន់ក្រោយ ដែលនឹងធ្វើអ្វីគ្រប់យ៉ាង ដើម្បីបន្តបង្ហូរឈាមជនជាតិជ្វីហ្វ នៅទីនេះ។ សម្រាប់ហេតុផលតែមួយនេះ យើងមិនអាចចូលរួមអបអរដោយការមើលឃើញនូវអ្វីមិនបានវែងឆ្ងាយ ឬបោះឆ្នោតគាំទ្រកិច្ចព្រមព្រៀងនេះទេ»៕