ក្រុមមន្ត្រីបាននិយាយថា ការវាយប្រហារផ្លូវអាកាសដ៏ធំមួយផ្សេងទៀតរបស់រុស្ស៊ី ស្រោចលើកណ្តាលទីក្រុងគីវ បានបង្កឱ្យមានអគ្គិភ័យយ៉ាងសន្ធោសន្ធៅក្នុងអគារផ្ទះល្វែងដ៏ខ្ពស់មួយកន្លែង និងបានកំណត់គោលដៅទីតាំងថាមពលជាច្រើននៅព្រឹកព្រលឹមថ្ងៃសុក្រ (១០ តុលា) នេះ ដោយកាត់ផ្តាច់អគ្គិសនីដល់ផ្នែកយ៉ាងទូលំទូលាយនៃរដ្ឋធានីអ៊ុយក្រែន។

អភិបាលក្រុងគីវ លោក Vitali Klitschko បាននិយាយថា មនុស្សមួយចំនួនបានរងរបួស ហើយត្រូវបញ្ជូនទៅមន្ទីរពេទ្យ ខណៈការដាច់ចរន្តអគ្គិសនី និងការរំខានដល់បណ្ដាញផ្គត់ផ្គង់ទឹក បានប៉ះពាល់ដល់ស្រុកនានានៅច្រាំងខាងកើតនៃទន្លេ Dnipro ដែលហូរកាត់ទីក្រុងគីវ។

រូបភាពដែលបានបង្ហោះតាមអ៊ីនធឺណិត បានបង្ហាញឱ្យឃើញផ្ទះល្វែងត្រូវឆាបឆេះ ខណៈក្រុមពន្លត់អគ្គិភ័យបានចុះដល់ទីតាំងកើតហេតុដើម្បីធ្វើការ។ បំណែកនៃយានដ្រូនដែលបានធ្លាក់ ក៏បានវាយប្រហារលើផ្នែកជាច្រើនទៀតនៃទីក្រុងគីវផងដែរ។

កងកម្លាំងរុស្ស៊ី បានផ្តោតលើហេដ្ឋារចនាសម្ព័ន្ធថាមពលរបស់អ៊ុយក្រែន ក្នុងប៉ុន្មានសប្តាហ៍ថ្មីៗនេះ ដោយសាររដូវរងាខិតចូលមកដល់ជាថ្មីម្តងទៀត នៅក្នុងសង្គ្រាមអាយុកាលជាង ៣ឆ្នាំកន្លះមកនេះ។ ការវាយប្រហារដោយមីស៊ីល និងយានបើកទ្រង់ទ្រាយធំមួយកាលពីសប្តាហ៍មុន បានកម្ទេចកន្លែងផលិតឧស្ម័នសំខាន់ៗរបស់អ៊ុយក្រែន ដែលបណ្តាលឱ្យមានការខូចខាតយ៉ាងច្រើន៕