ការបិទរដ្ឋាភិបាលសហព័ន្ធកំពុងប៉ះពាល់ដល់ឧស្សាហកម្មធ្វើដំណើររបស់សហរដ្ឋអាមេរិក ហើយឥទ្ធិពលនៃការបិទរដ្ឋាភិបាលនេះកាន់តែអាក្រក់ទៅៗដោយបង្កជាការរំខាន់ចរាចរណ៍ផ្លូវអាកាសយ៉ាងទូលំទូលាយបំផុត ខណៈភាពជាប់គាំងក្នុងសភារឿងកញ្ចប់ចំណាយនៅតែបន្ត។

អ្នកដំណើរមកពីទូទាំងពិភពលោក កំពុងគិតឡើងវិញ ដោយភាគច្រើនបានចាប់ផ្ដើមលុបចោលគម្រោងដំណើរកម្សាន្ត និងជៀសវាងការហោះហើរនៅអាកាសយានដ្ឋានអាមេរិក រហូតដល់សមាជិកសភាអាចទម្លាយភាពជាប់គាំងដើម្បីបើកដំណើរការរដ្ឋាភិបាលឡើងវិញបាន ដែលអាចនឹងត្រូវការពេលច្រើនថ្ងៃ ឬច្រើនសប្តាហ៍ទៀត។ នោះមានន័យថា បុគ្គលិកសំខាន់ៗ ដូចជាអ្នកត្រួតពិនិត្យចរាចរណ៍ផ្លូវអាកាស និងអ្នកត្រួតពិនិត្យសុវត្ថិភាព - ត្រូវទៅធ្វើការដោយគ្មានប្រាក់ឈ្នួល។ បុគ្គលិកកាន់តែច្រើនជ្រើសយកការឈប់សម្រាកមិនទៅធ្វើការ ដែលនាំឱ្យមានបុគ្គលិកតិចជាងតម្រូវការ។

ទីភ្នាក់ងារទេសចរ កំពុងបារម្ភថា មានការប៉ះពាល់ខ្លាំងដល់ការធ្វើដំណើរ ដោយសារថ្ងៃបុណ្យឈប់សម្រាកដ៏ធំនៅចុងសប្តាហ៍ជិតមកដល់ ដែលជាលើកទីមួយហើយចាប់តាំងពីរដ្ឋាភិបាលចាប់ផ្តើមបិទកាលពី ៩ថ្ងៃមុន តាំងតែពីថ្ងៃទី១ ខែតុលា មក។ លោក Geoff Freeman ប្រធានសមាគមទេសចរណ៍អាមេរិក និយាយថា ភាពជាប់គាំងនេះកើតឡើងស្របពេលរដូវកាលសម្រុកធ្វើដំណើរ ដែលនាំឱ្យពលរដ្ឋក្នុងស្រុកសម្រេចចិត្តនៅតែផ្ទះ ហើយអ្នកដំណើរបរទេសគេចពីទិសដៅអាមេរិក។

សហរដ្ឋអាមេរិក គឺជាទីផ្សារទេសចរណ៍តែមួយគត់ដែលរំពឹងថានឹងមើលឃើញការធ្លាក់ចុះនៃការចំណាយរបស់ភ្ញៀវទេសចរបរទេសនៅឆ្នាំ២០២៥នេះ ដោយសារការចូលទៅកម្សាន្តត្រូវរំពឹងថានឹងថយចុះ ៦,៣% ធៀបនឹងឆ្នាំមុន មកត្រឹម ៦៧,៩លាននាក់ នេះបើយោងតាមទិន្នន័យពីស្ថាប័នទេសចរណ៍អាមេរិក និងសេដ្ឋកិច្ច Oxford៕