ប្រភពនានាបានប្រាប់សារព័ត៌មាន Bloomberg ថា បន្ទាប់ពីការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពលនៅក្នុងតំបន់ Kharkov និង Poltava កាលពីថ្ងៃទី ៣ ខែតុលា ប្រទេសអ៊ុយក្រែនបានបាត់បង់សមត្ថភាពផលិតឧស្ម័នធម្មជាតិច្រើនជាង ៦០ ភាគរយ ហើយជាលទ្ធផល នឹងត្រូវចំណាយប្រហែល១,៩ ពាន់លានអឺរ៉ូ លើការនាំចូលឥន្ធនៈដើម្បីផ្គត់ផ្គង់រហូតដល់រដូវរងាខាងមុខនេះ។ 

សារព័ត៌មាន Bloomberg បានរាយការណ៍កាលពីថ្ងៃទី៩តុលាដោយសំអាងដល់ប្រភពនានាដែលពុំបានបញ្ជាក់ ថា ការវាយប្រហាររបស់រុស្ស៊ី ជាបន្តបន្ទាប់បានបំផ្លាញសមត្ថភាពផលិតកម្មឧស្ម័នធម្មជាតិរបស់អ៊ុយក្រែនជាងពាក់កណ្ដាល មុនរដូវរងាចូលមកដល់។

យោងតាមទីភ្នាក់ងារព័ត៌មាននេះ ប្រសិនបើការវាយប្រហារលើហេដ្ឋារចនាសម្ព័ន្ធថាមពលនៅតែបន្ត អ៊ុយក្រែននឹងត្រូវទិញឧស្ម័នធម្មជាតិប្រហែល ៤,៤ ពាន់លានម៉ែត្រគីប នៅចុងខែមីនា ឆ្នាំ ២០២៦ ខាងមុខ។ បរិមាណនេះគឺស្មើនឹង ២០ ភាគរយនៃការប្រើប្រាស់ថាមពលប្រចាំឆ្នាំរបស់ប្រទេសនេះ ។

សារព័ត៌មានBloomberg ដដែលបន្ថែមថាអ៊ុយក្រែនបានទិញឧស្ម័នធម្មជាតិប្រហែល ៤,៦ ពាន់លានម៉ែត្រគីប រួចហើយពីក្រុមហ៊ុនផ្គត់ផ្គង់បរទេសនៅឆ្នាំនេះ។ទីក្រុង Kyiv ប៉ាន់ប្រមាណថា នៅចុងឆ្នាំនេះ ប្រទេសនេះនឹងត្រូវការឧស្ម័នធម្មជាតិចំនួន៥,៨ ពាន់លានម៉ែត្រគីប ទោះបីជាតួលេខនេះអាចកើនឡើងអាស្រ័យលើកត្តាជាច្រើន ក៏ដោយ ជាពិសេស ថាតើអ៊ុយក្រែនអាចស្ដារហេដ្ឋារចនាសម្ព័ន្ធថាមពលរបស់ខ្លួនបានលឿនប៉ុណ្ណា៕