អ្នកឈ្នះរង្វាន់ណូបែលសន្តិភាពឆ្នាំ២០២៥ នឹងត្រូវប្រកាសនៅថ្ងៃសុក្រ (១០ តុលា) នេះ ក្នុងរយៈពេលពេញមួយឆ្នាំដែលគ្របដណ្តប់ដោយកិច្ចប្រឹងប្រែងរបស់លោកប្រធានាធិបតីអាមេរិក Donald Trump ដើម្បីឈ្នះពានរង្វាន់ដ៏មានកិត្យានុភាពបំផុតរបស់ពិភពលោកមួយនេះ។

លោក Trump បានប្រកាសពីបំណងប្រាថ្នារបស់លោកសម្រាប់ពានរង្វាន់ណូបែលសន្តិភាព ដែលឈ្នះដោយប្រធានាធិបតីអាមេរិកចំនួន ៤រូបមកហើយ គឺលោក Barack Obama ក្នុងឆ្នាំ២០០៩ លោក Jimmy Carter ក្នុងឆ្នាំ២០០២ លោក Woodrow Wilson ក្នុងឆ្នាំ១៩១៩ និងលោក Theodore Roosevelt ក្នុងឆ្នាំ១៩០៦។ ឥស្សរជនទាំងអស់ — លើកលែងតែលោក Carter — បានឈ្នះពានរង្វាន់នេះពេលកំពុងកាន់តំណែង ហើយលោក Obama បានដាក់ឈ្មោះជាអ្នកឈ្នះតិចជាង ៨ខែបន្ទាប់ពីឡើងកាន់តំណែងរួច ដែលជាពេលវេលាដូចគ្នានឹងលោក Trump នៅពេលនេះ។

លោក Joergen Watne Frydnes ដែលជាប្រធានគណៈកម្មាធិការណូបែលប្រទេសន័រវេស នឹងប្រកាសឈ្មោះអ្នកទទួលបានពានដ៏ខ្ពង់ខ្ពស់មួយនេះ នៅវិទ្យាស្ថានណូបែលន័រវេសនៅទីក្រុង Oslo វេលាម៉ោងក្នុងស្រុក ១១ព្រឹក (ត្រូវនឹងម៉ោងសកល ០៩:០០ GMT) ខណៈអ្នកជំនាញលើពានរង្វាន់នេះគិតថា អ្នកឈ្នះប្រហែលមិនមែនជាលោក Trump នោះទេ។

លោក Trump ប្រកាសកិច្ចព្រមព្រៀងបទឈប់បាញ់តំបន់ហ្កាហ្សាដំណាក់កាលដំបូងកាលពីថ្ងៃពុធសប្ដាហ៍នេះ ក្រោមគំនិតផ្តួចផ្តើមសន្តិភាពរបស់លោក។ ប៉ុន្តែបើយោងតាមកាសែតន័រវេស VG បានឱ្យដឹងថា គណៈកម្មាធិការបានសម្រេចចិត្តរួចទៅហើយកាលពីថ្ងៃចន្ទ - ពោលគឺមុនពេលការប្រកាសកិច្ចព្រមព្រៀងហ្កាហ្សា - ហើយបើទោះបីជាសមាជិកទាំង ៥រូបរបស់គណៈកម្មាធិការនេះបានដឹងរឿងមុននឹងធ្វើការជ្រើសរើសអ្នកឈ្នះរង្វាន់នៅឆ្នាំនេះក៏ដោយ ក៏ពួកគេមិនអាចសម្រេចចិត្តបែបប្រញាប់ប្រញាល់បានទេ ព្រោះគេតែងតែចំណាយពេលជជែកគ្នារាប់ខែលើបញ្ហានេះ៕