លោកប្រធានាធិបតីអាមេរិក Donald Trump បាននិយាយកាលពីថ្ងៃព្រហស្បតិ៍ (៩ តុលា) ថា ចំណាប់ថ្នូរតំបន់ហ្កាហ្សា គួរតែត្រូវដោះលែងនៅថ្ងៃចន្ទ ឬថ្ងៃអង្គារ ដើមសប្ដាហ៍ក្រោយនេះ ហើយលោកសង្ឃឹមថានឹងចូលរួមក្នុងពិធីចុះហត្ថលេខាមួយនៅអេហ្ស៊ីប និងថ្លែងសុន្ទរកថាទៅកាន់សភាអ៊ីស្រាអែល។

លោក Trump បានបើកកិច្ចប្រជុំគណៈរដ្ឋមន្ត្រីនៅសេតវិមាន ដោយពិភាក្សាពីកិច្ចព្រមព្រៀងដែលសម្រេចបានកាលពីថ្ងៃពុធសប្ដាហ៍នេះ ក្រោមផែនការសន្តិភាពរបស់លោក ដែលនឹងមើលឃើញចំណាប់ថ្នូរក្នុងដៃក្រុមសកម្មប្រយុទ្ធហាម៉ាស នឹងត្រូវដោះលែងក្នុងដំណាក់កាលដំបូងនៃកិច្ចព្រមព្រៀងយ៉ាងទូលំទូលាយនៅតំបន់ហ្កាហ្សា ដែលលោកជឿថា នឹងនាំទៅរក «សន្តិភាពយូរអង្វែង»។

លោក Trump បាននិយាយថា នៅក្រោមផែនការនេះ ហ្កាហ្សានឹងត្រូវ "ស្តារឡើងវិញជាបណ្តើរៗ" ដែលជាការយោងទៅលើផែនការកសាងតំបន់ប៉ាឡេស្ទីននេះឡើងវិញ។ លោកមិនបានលម្អិតច្រើនទេ ដោយគ្រាន់តែនិយាយថា "អាមេរិកនឹងបង្កើតកន្លែងមួយដែលមនុស្សអាចរស់នៅបាន ព្រោះឥឡូវនេះ ហ្កាហ្សាមិនអាចរស់នៅបានទេ"។

ក្រុមហាម៉ាស ត្រូវរំពឹងថានឹងដោះលែងចំណាប់ថ្នូរនៅរស់ទាំងអស់ចំនួន ២០នាក់ ក្នុងពេល ៧២ម៉ោងបន្ទាប់ពីបទឈប់បាញ់ចាប់ផ្តើម។ ទាក់ទងនឹងរឿងនេះ លោក Trump បាននិយាយថា ចំណាប់ថ្នូរទាំងនោះនឹងត្រឡប់មកវិញនៅថ្ងៃចន្ទ ឬក៏ថ្ងៃអង្គារ ហើយនឹងក្លាយជាពេលវេលាដ៏ត្រេកអរបំផុត។ ប្រធានាធិបតីអាមេរិករូបនេះ បន្ថែមថា គេអាចពិបាកក្នុងការយកសពចំណាប់ថ្នូរទាំងអស់ដែលស្លាប់ បានភ្លាមៗ "ពីព្រោះសាកសពខ្លះនឹងពិបាករកបន្តិចហើយ"៕