ភ្នំពេញ: ឯកឧត្តម ចៅ តុល អនុប្រធានទី២ក្រុមការងារគណបក្សប្រជាជនកម្ពុជា ស្រុកកោះធំ ចុះជួយឃុំព្រែកថ្មី បានអំពាវនាវដល់បងប្អូនខ្មែរឥស្លាម ក៏ដូចជាបងប្អូនខ្មែរទាំងអស់ដែលរស់នៅស្រុក កោះធំ ខេត្តកណ្តាលបើមិនទាន់បានចាក់ វ៉ាក់សាំងដូសជំរុញទេ គប្បីប្រញ៉ាប់ប្រញ៉ាលទៅចាក់ ដើម្បីឲ្យមានភាពស៊ាំក្នុងសហគមន៍ ក៏ដូចជាបង្កើនអង់ទីគ័រខ្លួន ក្នុងការបង្ការ និងទប់ស្កាត់ ការរីករាលដាលនូវមេរោគកូវីដ១៩។

ក្នុងពិធីសំណេះសំណាលជាមួយសមាជិក សមាជិកា និងប្រជាពលរដ្ធខ្មែរឥស្លាម ក្នុងឃុំព្រែកថ្មី ស្រុកកោះធំ ខេត្តកណ្តាល នារសៀលថ្ងៃទី៣ ខែកុម្ភៈ ឆ្នាំ២០២២នេះ ឯកឧត្តម ចៅ តុល បានលើកឡើងថាមានតែប្រទេសកម្ពុជាទេ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានយកវ៉ាក់សាំងការពារជម្ងឺកូវីដ១៩ ចាក់ស្រោចពេញប្រទេសដល់ប្រជាពលរដ្ធដោយមិនគិតថ្លៃ ហើយមិនប្រកាន់ពូជសាសន៍ និងនិន្នាការនយោបាយជាដើមនោះ។

ឯកឧត្តមបានបន្តទៀតថា ខណៈដែលរាជរដ្ឋាភិបាលបានខិតខំស្វែងរកវ៉ាក់សាំងមកចាក់ជូនដល់បងប្អូន គ្រប់រូបនៅទូទាំងប្រទេសនោះ ហើយបងប្អូនណាដែលមិនទាន់បានចាក់គប្បីប្រញ៉ាប់ទៅចាក់ ដើម្បីបង្ការខ្លួនឲ្យរួចផុតពីការឆ្លងនូវមេរោគកូវីដ១៩ ខណៈមេរោគកូវីដ១៩នេះនៅតែបន្តយាយីនៅលើពិភពលោកនៅឡើយ ជាពិសេសមេរោគកូវីដ១៩បំប្លែងថ្មីប្រភេទអូមីក្រុងនេះតែម្តង។ 

ឯកឧត្តមបានលើកឡើងទៀតថា ក្នុងដំណាក់កាលដែលប្រទេសកម្ពុជា ស្ថិតក្នុងស្ថានភាពនៃការបិទខ្ទប់ប្រទេស រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុនសែន មិនត្រឹមតែគិតគូរយកចិត្តទុកដាក់ពីសុខទុក្ខ និងជីវភាពការរស់នៅទេ ដោយសម្តេចបានឱ្យមន្រ្តីគ្រប់លំដាប់ថ្នាក់ផ្តល់ទាំងស្បៀងអាហារ ថែទាំសុខភាពអ្នកដែលបានឆ្លងជម្ងឺកូវីដ១៩ក្នុងសហគមន៍ផងដែរ។ 

ជាងនេះទៅទៀតសម្តេចតេជោ ក៏បានជម្រុញដល់មន្រ្តីសុខាភិបាល និងកងទ័ព បង្កើនល្បឿនក្នុងការយកវ៉ាក់សាំងការពារជំងឺកូវីដ១៩ ជូនប្រជាពលរដ្ធដល់ក្នុងមូលដ្ឋានដោយឥតគិតថ្លៃ រួមទាំងជនបរទេសផងដែរឱ្យតែនៅក្នុងប្រទេសកម្ពុជា តាំងពីដូសទី១រហូតដល់ដូសទី៤ ស្របតាមការវិវិត្តនៃជម្ងឺកូវីដ១៩។ 

នៅក្នុងពិធីសំណេះសំណាលនោះដែរ ចៅ តុល ក៏បានក្រើនរំលឹកដល់បងប្អូនខ្មែរឥស្លាម ដែលកំពុងរស់នៅស្រុកោះធំនោះដែរថា ក្រោមការដឹកនាំរបស់គណបក្សប្រជាជនកម្ពុជានាពេលបច្ចុប្បន្ន បានធ្វើឲ្យប្រទេសកម្ពុជាមានសុខសន្តិភាព និងការអភិវឌ្ឍយ៉ាងឆាប់រហ័ស ដោយមានផ្លូវថ្នល់ ស្ពាន សាលារៀន មន្ទីរពេទ្យ វត្តអារាមហេដ្ឋារចនាសម្ព័ន្ធនៅទូទាំងប្រទេស ពិសេសស្ពានឆ្លងកាត់ទន្លេជាសមិទ្ធផលថ្មីបានរីកដុះដាលជាបន្តបន្ទាប់។

យ៉ាងណាក៏ដោយឯកឧត្តម ចៅ តុល ក៏បានផ្តាំផ្ញើដល់ក្រុមប្រឹក្សាឃុំ ខិតខំប្រែងប្រែងបន្ថែមទៀតក្នុងការបំរើប្រជាពលរដ្ធក្នុងមូលដ្ឋាន ជំរុញការបង្ក្រាបទប់ស្កាត់គ្រឿងញៀន ល្បែងស៊ីសងគ្រប់ប្រភេទ ដើម្បីទទួលបានការទុកចិត្តពីសំណាក់ប្រជាជន ធ្វើយ៉ាងណាដណ្តើមភាពឈ្នះនាពេលខាងមុខ និងបានអំពាវនាវឱ្យប្រជាពលរដ្ធខ្មែរឥស្លាមនៅឃុំព្រែកថ្មីទាំងអស់ អញ្ជើញទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ឱ្យបានគ្រប់ៗគ្នានៅថ្ងៃទី៥ ខែមិថុនា ឆ្នាំ២០២២ និងត្រូវបោះឆ្នោតជូនគណបក្សប្រជាជនកម្ពុជា ដើម្បីបន្តដឹកនាំនិងអភិវឌ្ឍប្រទេសកម្ពុជា ឱ្យមានការរីកចម្រើនមកដល់ពេលបច្ចុប្បន្ន៕អត្ថបទ: បាន ចក់