សារព័ត៌មានរដ្ឋកូរ៉េខាងជើង KCNA រាយការណ៍ថា នាយករដ្ឋមន្រ្តីចិនលោក Li Qiang បានធ្វើដំណើរមកដល់កូរ៉េខាងជើង សម្រាប់ការបំពេញដំណើរទស្សនកិច្ចសុឆន្ទៈផ្លូវការ ដើម្បីចូលរួមព្រឹត្តការណ៍រំឭកខួប ៨០ឆ្នាំនៃគណបក្សពលករកូរ៉េ(WPK) ។

លោក Li ត្រូវបានស្វាគមន៍នៅអាកាសយានដ្ឋានអន្តរជាតិក្រុងព្យុងយ៉ាងដោយនាយករដ្ឋមន្រ្តីកូរ៉េខាងជើងលោក Pak Thae Song និងក្រុមមន្រ្តីជាន់ខ្ពស់ជាច្រើនរូបទៀត ជាទីដែលភ្លេងជាតិត្រូវបានលេង ហើយលោក Li ត្រួតពិនិត្យឆ្មាំកិត្តិយសនៃកងទ័ពប្រជាជនកូរ៉េ ត្រូវបានមើលឃើញនៅក្នុងវីដេអូផ្តល់ជូនដោយ KCNA ដែលទីភ្នាក់ងារព័ត៌មានរ៉យទ័រពុំអាចបញ្ជាក់ផ្ទៀងផ្ទាត់ដោយឯករាជ្យបាននោះទេ ។

ដោយឡែក គណៈប្រតិភូរបស់គណបក្សកាន់អំណាចរុស្ស៊ីដឹកនាំដោយលោកអតីតប្រធានាធិបតី Dmitry Medvedev បានធ្វើដំណើរទៅដល់ទីក្រុងព្យុងយ៉ាងផងដែរ ដើម្បីចូលរួមពិធីរំឭកខួបគណបក្ស WPK ហើយត្រូវបានស្វាគមន៍ដោយអនុរដ្ឋមន្រ្តីការបរទេសកូរ៉េខាងជើងលោក Im Chon Il ។

KCNA រាយការណ៍ថា គណៈប្រតិភូទាំង ២ បាននៅកូរ៉េខាងជើង តាមការអញ្ជើញរបស់គណបក្ស WPK ដើម្បីចូលរួមពិធីរំឭកខួបគណបក្សកាន់អំណាចកូរ៉េខាងជើង ។

KCNA បានរាយការណ៍ផងដែរថា លោកមេដឹកនាំ Kim Jong Un គីម បានលើកសរសើរដំណែលរបស់គណបក្សកាន់អំណាចកូរ៉េខាងជើង ដោយលោកនិយាយថា បក្សមិនដែលប្រព្រឹត្តខុស ឬធ្វើកំហុសមួយសោះឡើយក្នុងប្រវត្តិសាស្ត្រ ៨០ឆ្នាំរបស់ខ្លួន ហើយបានដឹកនាំប្រទេសកូរ៉េខាងជើង លើផ្លូវឆ្ពោះទៅរកកំណើនប្រកបដោយប្រាជ្ញា និងកម្លាំងរបស់ប្រជាជន ៕