រដ្ឋមន្រ្តីការបរទេសឥណ្ឌាលោក Subrahmanyam Jaishankar និយាយនៅថ្ងៃសុក្រនេះថា ឥណ្ឌានឹងបើកស្ថានទូតរបស់ខ្លួនឡើងវិញនៅក្នុងរដ្ឋធានីកាប៊ុល ប្រទេសអាហ្វហ្គានីស្ថាន ក្រោយត្រូវបានបិទកាលពីរយៈពេល ៤ឆ្នាំមុន គឺជាចំណាត់ការដ៏សំខាន់មួយបង្កើនទំនាក់ទំនងការទូតរបស់ប្រទេសគ្រប់គ្រងដោយក្រុមតាលីបង់មួយនេះ ។

ឥណ្ឌាបានបិទស្ថានទូតរបស់ខ្លួននៅក្នុងទីក្រុងកាប៊ុល ក្រោយក្រុមតាលីបង់រឹបអូសអំណាច បន្ទាប់ពីការដកកងកម្លាំងណាតូដឹកនាំដោយសហរដ្ឋអាមេរិកកាលពីឆ្នាំ ២០២១ ប៉ុន្តែពួកគេបានបន្តបេសកកម្មតូចៗប៉ុណ្ណោះរយៈពេល ១ឆ្នាំក្រោយមក ដើម្បីសម្របសម្រួលពាណិជ្ជកម្ម ការគាំទ្រវេជ្ជសាស្រ្ត និងជំនួយមនុស្សធម៌ ។

ប្រទេសរាប់សិបប៉ុណ្ណោះ រួមទាំងចិន រុស្ស៊ី អ៊ីរ៉ង់ ប៉ាគីស្ថាន និងទួរគី មានស្ថានទូតប្រតិបត្តិការនៅទីក្រុងកាប៊ុល បើទោះបីជារុស្ស៊ីគឺជាប្រទេសតែមួយគត់ទទួលស្គាល់ជាផ្លូវការរដ្ឋបាលតាលីបង់ ។

ការប្រកាសរបស់រដ្ឋធានីញូវដែល្លី បានកើតមានឡើង ពេលដែលរដ្ឋមន្រ្តីការបរទេសតាលីបង់របស់អាហ្វហ្គានីស្ថានលោក Amir Khan Muttaqi ចាប់ផ្តើមជជែកពិភាក្សាជាមួយលោក Jaishankar លើអ្វីដែលជាដំណើរទស្សនកិច្ចលើកដំបូងទៅកាន់ប្រទេសឥណ្ឌាដោយមេដឹកនាំតាលីបង់ ចាប់តាំងពីឆ្នាំ ២០២១ ។

លោក Jaishankar បាននិយាយប្រាប់លោក Muttaqi នៅក្នុងអនុសាសន៍បើកចំហររបស់លោកថា ឥណ្ឌាប្តេជ្ញាចិត្តពេញទំហឹងចំពោះអធិបតេយ្យភាព បូរណភាពទឹកដី និងឯករាជ្យភាពរបស់អាហ្វហ្គានីស្ថាន ។

លោកបន្តថា កិច្ចសហប្រតិបត្តិការជិតស្និតរវាងពួកយើង រួមចំណែកយ៉ាងសំខាន់ដល់ការអភិវឌ្ឍជាតិរបស់អ្នក ក៏ដូចជាស្ថិរភាព និងភាពធន់ក្នុងតំបន់ ហើយបេសកកម្មបច្ចេកទេសរបស់ឥណ្ឌានៅក្នុងទីក្រុងកាប៊ុល ត្រូវបានដំឡើងឋានៈជាស្ថានទូត ៕