នៅថ្ងៃសុក្រនេះ ប្រធានាធិបតីទម្លាក់ចេញពីអំណាចរបស់ប៉េរូលោកស្រី Dina Boluarte បានថ្លែងទៅកាន់ប្រជាជាតិ បន្ទាប់ពីការបោះឆ្នោតជាឯកច្ឆន្ទរបស់សមាជិកសភា ដើម្បីដកតំណែងរបស់លោកស្រី ខណៈប្រជាពលរដ្ឋអបអរការដកតំណែងនេះ ។ 

ភ្លាមៗបន្ទាប់ពីសភាបានបោះឆ្នោតដកតំណែង លោកស្រី Boluarte បានថ្លែងសុន្ទរកថានៅវិមានប្រធានាធិបតី ជាទីដែលលោកស្រីលើកឡើងថា សភាដែលបានធ្វើឲ្យលោកស្រីក្លាយជាប្រធានាធិបតី កាលពីចុងឆ្នាំ២០២២ ឥឡូវនេះ បានបោះឆ្នោតទម្លាក់លោកស្រី ដោយលោកស្រីទទួលស្គាល់ថា ចំណាត់ការរបស់ពួកគេ មានផលប៉ះពាល់ដល់ស្ថិរភាពនៃលទ្ធិប្រជាធិបតេយ្យនៅក្នុងប្រទេសប៉េរូ ។

ខណៈពេលនោះដែរ ប្រធានសភាលោក Jose Jeri បានស្បថចូលកាន់តំណែងជាប្រធានាធិបតីថ្មីរបស់ប្រទេសប៉េរូ រយៈពេលមិនដល់មួយម៉ោងផង បន្ទាប់ពីសមាជិកសភា បោះឆ្នោតជាឯកច្ឆន្ទ ដើម្បីទម្លាក់តំណែងលោកស្រី Boluarte ដែលជាមេដឹកនាំដ៏មានប្រជាប្រិយភាពបំផុតមួយរបស់ពិភពលោក ។ 

ការបោះឆ្នោត និងពិធីស្បថចូលកាន់តំណែង បានធ្វើឡើងភ្លាមៗ បន្ទាប់ពីពាក់កណ្ដាលអធ្រាត្រថ្ងៃសុក្រ ពោលគឺត្រឹមតែប៉ុន្មានម៉ោងប៉ុណ្ណោះ បន្ទាប់ពីប្លុកនយោបាយមកពីគ្រប់មជ្ឈដ្ឋាន បានបង្ហាញជាលើកដំបូងនូវញត្តិស្នើឲ្យដកតំណែងលោកស្រី Boluarte ក្រោមហេតុផលអសមត្ថភាពផ្នែកសីលធម៌ ។

លោក Jeri ដែលក្លាយជាប្រធានាធិបតីទី៧ របស់ប្រទេសប៉េរូ ចាប់តាំងពីឆ្នាំ២០១៦ និយាយថា លោកនឹងចាត់វិធានការតឹងរ៉ឹង ពាក់ព័ន្ធនឹងស្ថានភាពអសន្តិសុខកើនឡើង ជាការរិះគន់ដ៏សំខាន់មួយដែលត្រូវបានយកមកដាក់បន្ទុកលើលោកស្រី Boluarte ៕