ទាហានអ៊ីស្រាអែល បានចាប់ផ្តើមដកចេញពីផ្នែកខ្លះនៃតំបន់ហ្កាហ្សា នៅថ្ងៃសុក្រ (ទី១០ ខែតុលា) នេះ ក្រោមកិច្ចព្រមព្រៀងឈប់បាញ់ជាមួយក្រុមហាម៉ាស ហើយអ្នកស្រុកមួយចំនួន បានវិលត្រលប់ទៅសង្កាត់ដែលរងការបំផ្លិចបំផ្លាញ ស្របពេលមានមន្ទិលសង្ស័យ ជុំវិញថា តើអរិភាពនេះនឹងត្រូវបានផ្អាករយៈពេលយូរប៉ុនណា បន្ទាប់ពីមានសង្គ្រាមបង្ហូរឈាមរយៈពេល ២ឆ្នាំ។

រដ្ឋាភិបាលអ៊ីស្រាអែលបានផ្តល់សច្ចាប័នលើបទឈប់បាញ់ជាមួយក្រុមហាម៉ាស នាព្រឹកព្រលឹមថ្ងៃសុក្រនេះ ដោយបានបើកផ្លូវឲ្យមានការផ្អាកអរិភាព នៅតំបន់ហ្កាហ្សា ក្នុងរយៈពេល ២៤ម៉ោង និងការដោះលែងចំណាប់ថ្នូរអ៊ីស្រាអែលដែលត្រូវបានឃុំខ្លួននៅទីនោះ ក្នុងរយៈពេល ៧២ម៉ោងបន្ទាប់ពីនោះ។

គួរបញ្ជាក់ថា ដំណាក់កាលដំបូងនៃគំនិតផ្តួចផ្តើមរបស់លោកប្រធានាធិបតីអាមេរិក Donald Trump ដើម្បីបញ្ចប់សង្រ្គាមរយៈពេល ២ឆ្នាំ នៅតំបន់ហ្កាហ្សា អំពាវនាវឲ្យមានការដោះដូរចំណាប់ថ្នូរអ៊ីស្រាអែល ជាមួយអ្នកទោសប៉ាឡេស្ទីន និងការចាប់ផ្តើមដកទ័ពអ៊ីស្រាអែល។

បើយោងតាមអ្នកស្រុកដែលមានទំនាក់ទំនងជាមួយសារព័ត៌មាន Reuters បានឲ្យដឹងថា នៅទីក្រុង Khan Younis ភាគខាងត្បូងតំបន់ហ្កាហ្សាស្ទ្រីប ទាហានអ៊ីស្រាអែលមួយចំនួន បានដកចេញពីតំបន់ភាគខាងកើតក្បែរព្រំដែន ប៉ុន្តែសំឡេងបាញ់ផ្លោងដោយរថក្រោះត្រូវបានឮ។

នៅឯជំរុំ Nusseirat នៅកណ្តាលដែនដីនេះ ទាហានអ៊ីស្រាអែលមួយចំនួន បានរុះរើទីតាំងរបស់ពួកគេ ហើយបានធ្វើដំណើរឆ្ពោះទៅទិសខាងកើតឆ្ពោះទៅព្រំដែនអ៊ីស្រាអែល ប៉ុន្តែកងទ័ពផ្សេងទៀត នៅតែស្ថិតក្នុងតំបន់នោះ បន្ទាប់ពីមានស្នូរកាំភ្លើង នាព្រឹកព្រលឹមថ្ងៃសុក្រនេះ។

ជាមួយគ្នានេះ កងកម្លាំងអ៊ីស្រាអែលបានដកចេញពីផ្លូវតាមបណ្តោយឆ្នេរសមុទ្រមេឌីទែរ៉ាណេ ចូលទៅក្នុងទីក្រុងហ្កាហ្សា ជាកន្លែងដែលមនុស្សរាប់រយនាក់បានប្រមូលផ្តុំគ្នា ដោយសង្ឃឹមថា នឹងបានវិលត្រលប់ទៅកណ្តាលទីក្រុងដ៏សំខាន់នៃដែនដីនេះវិញ ជាទីដែលស្ថិតក្រោមការវាយលុករបស់អ៊ីស្រាអែលកាលពីខែមុន។ អ្នកស្រុកជាច្រើនបានប្រាប់ឲ្យដឹងថា ការបាញ់កាំភ្លើងនៅក្បែរនោះ បានធ្វើឲ្យមនុស្សជាច្រើនស្ទាក់ស្ទើរ ក្នុងការបម្លាស់ទី ហើយមានតែមនុស្សមួយចំនួនប៉ុណ្ណោះដែលព្យាយាមឆ្លងកាត់ដោយថ្មើរជើង៕