អ្នកឈ្នះជ័យលាភីពានរង្វាន់ណូបែលសន្តិភាពឆ្នាំ ២០២៥នេះ គឺជាអ្នកនយោបាយវេណេស៊ុយអេឡាលោកស្រី Maria Corina Machado ។

លោកស្រីត្រូវបានគេទទួលស្គាល់សម្រាប់ការងារឥតនឿយហត់របស់លោកស្រី ក្នុងការលើកកម្ពស់សិទ្ធិប្រជាធិបតេយ្យសម្រាប់ប្រជាពលរដ្ឋវេណេស៊ុយអេឡា ហើយនិងការប្រឹងប្រែងរបស់លោកស្រី ក្នុងការសម្រេចបានការផ្លាស់ប្តូរដោយសន្តិភាព និងយុត្តិធម៌ពីរបបផ្តាច់ការទៅជាលទ្ធិប្រជាធិបតេយ្យ ។

ចំណែកឯប្រធានាធិបតីសហរដ្ឋអាមេរិកលោក Donald Trump បាននាំមុខយុទ្ធនាការសាធារណៈ ដើម្បីឈ្នះរង្វាន់មួយនេះ ប៉ុន្តែការតែងតាំងបានបិទបញ្ចប់កាលពីខែមករា នៅពេលចាប់ផ្តើមអាណត្តិទី ២របស់លោកនៅសេតវិមាន ។

គណៈកម្មាធិការណូបែលន័រវេសនិយាយថា លោកស្រី Machado ឈានដល់លក្ខណៈវិនិច្ឆ័យទាំងអស់ដែលបានដាក់ចេញដោយលោក Alfred Nobel សម្រាប់រង្វាន់មួយនេះ ។

លោកស្រីបានធ្វើឲ្យក្រុមប្រឆាំងវេណេស៊ុយអេឡារួបរួមគ្នា ប្រកាន់ភ្ជាប់ការគាំទ្ររបស់លោកស្រីសម្រាប់ការផ្លាស់ប្តូរដោយសន្តិវិធីឆ្ពោះទៅរកលទ្ធិប្រជាធិបតេយ្យ ។

គណៈកម្មាធិការណូបែលន័រវេសនិយាយថា លោកស្រី Machado បានបង្ហាញថា អាវុធលទ្ធិប្រជាធិបតេយ្យ គឺជាអាវុធសម្រាប់សន្តិភាពផងដែរ ។ ម្ចាស់ជ័យលាភីតំណាងឲ្យក្តីសង្ឃឹមសម្រាប់អនាគត ជាទីដែលសិទ្ធិពលរដ្ឋត្រូវបានការពារ ។ 

ពួកគេបានធ្វើការសន្និដ្ឋានថា មនុស្សនាពេលអនាគតទីបំផុតនឹងមានសេរីភាពរស់រានក្នុងសន្តិភាព ។ វាសំខាន់ខ្លាំងណាស់ ក្នុងការទទួលស្គាល់អ្នកការពារសេរីភាព និងលទ្ធិប្រជាធិបតេយ្យដ៏ក្លាហានបែបនេះ ។

សូមបញ្ជាក់ថា វ៉េណេស៊ុយអេឡាបានវិវត្តន៍ពីប្រទេសប្រជាធិបតេយ្យ និងប្រកបដោយវិបុលភាព ទៅជារដ្ឋផ្តាច់ការ និងឃោរឃៅដែលបច្ចុប្បន្នកំពុងជួបវិបត្តិមនុស្សធម៌ និងសេដ្ឋកិច្ច ។ 

ភាគច្រើននៃពលរដ្ឋវេណេស៊ុយអេឡា រស់នៅក្នុងភាពក្រីក្រដ៏ជ្រាលជ្រៅ ។ យន្តការហិង្សារបស់រដ្ឋត្រូវបានបញ្ជាឲ្យប្រឆាំងពលរដ្ឋខ្លួនឯង ។ មនុស្សជិត ៨លាននាក់ បានចាកចេញពីប្រទេស ហើយក្រុមប្រឆាំងត្រូវបានគាបសង្កត់ជាប្រព័ន្ធតាមរយៈមធ្យោបាយជាច្រើន រួមទាំងការក្លែងបន្លំសន្លឹកឆ្នោត ការកាត់ទោសតាមផ្លូវច្បាប់ និងការដាក់ពន្ធនាគារ ៕