បាល់ទាត់៖ លោក កែវ សុខង៉ន អ្នកចាត់ការក្រុមភ្នំពេញក្រោនបានបង្ហាញនូវជំហរយ៉ាងមុតមាំ ក្នុងនាមក្រុមការពារតំណែងជើងឯកនៃលីគកំពូលកម្ពុជាឆ្នាំ២០២២ ហើយលោកថា ការធ្វើកំណែទម្រង់ពីសំណាក់ក្រុមហ៊ុនលីគបាល់ទាត់កម្ពុជា នឹងជំរុញឲ្យមានការប្រកួតប្រជែងកាន់តែខ្លាំង ហើយក៏ផ្ដល់នូវផលល្អ និងមិនល្អផងដែរ។
អ្នកចាត់ការក្រុមវ័យក្មេងរូបនេះបានបញ្ជាក់ថា ភ្នំពេញក្រោនកំពុងត្រៀមខ្លួនយ៉ាងល្អសម្រាប់ត្រៀមរដូវកាលថ្មីឆ្នាំ២០២២។ ចំពោះការកែទម្រង់សល់ក្រុមតិចតែប្រជុំដោយក្រុមខ្លាំងៗវិញ លោកថា គឺជារឿងល្អដែលនឹងជំរុញឲ្យមានការប្រកួតប្រជែងខ្លាំង ហើយអាចទាក់ទាញទាំងអ្នកគាំទ្រ និងដៃគូសហការ។ តែទន្ទឹមជាមួយគ្នាក៏មានផលប៉ះពាល់ខ្លះដែរ ពិសេសសម្រាប់ក្រុមមានប្រកូតក្រៅប្រទេស និងកីឡាករជាប់ជម្រើសជាតិតែម្ដង។ គួរដឹងថា ភ្នំពេញក្រោនគឺជាក្រុមជោគជ័យជាងគេក្នុងក្របខណ្ឌលីគកំពូលកម្ពុជា ដោយធ្លាប់គ្រងជើងឯករហូតដល់ ៧លើក ហើយថ្មីៗនេះពួកគេក៏ទើបលើកពានរង្វាន់ Pre-Season មួយដែលបញ្ជាក់ពីការត្រៀមខ្លួនបានយ៉ាងល្អរបស់ក្រុមរហស្សនាមសិង្ហក្រហមនេះ ដើម្បីដំណើរឆ្ពោះទៅការពារតំណែងជើងឯករដូវកាលថ្មីឆ្នាំ២០២២ នេះផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
