លោកអធិការបតី Friedrich Merz នៅថ្ងៃសុក្រ (ទី១០ ខែតុលា) នេះ បានប្រាប់ឲ្យដឹងថា ប្រទេសអាល្លឺម៉ង់ចង់រៀបចំសន្និសីទអន្តរជាតិមួយជាមួយអេហ្ស៊ីប សម្រាប់ការកសាងឡើងវិញនូវតំបន់ហ្កាហ្សាស្ទ្រីប ខណៈដែលអ៊ីស្រាអែល និងក្រុមហាម៉ាសកាន់តែខិតជិតនឹងការបញ្ចប់អរិភាព។

លោក Merz បានលើកឡើងនៅក្នុងសេចក្តីថ្លែងការណ៍មួយថា គោលដៅសំខាន់នៃសន្និសីទនេះ «គួរតែជាការដោះស្រាយតម្រូវការបន្ទាន់បំផុត ដូចជាការស្ដារឡើងវិញនូវការផ្គត់ផ្គង់ទឹក និងថាមពល ព្រមទាំងការថែទាំវេជ្ជសាស្រ្ត»។

នៅថ្ងៃសុក្រ (ទី១០ ខែតុលា) នេះ ការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា រដ្ឋាភិបាលបាន «អនុម័តក្របខ័ណ្ឌ» នៃកិច្ចព្រមព្រៀងដោះលែងចំណាប់ថ្នូរជាមួយក្រុមហាម៉ាស។

ហើយលោក Merz បាននិយាយថា កិច្ចព្រមព្រៀងត្រូវតែត្រូវបាន «អនុវត្តយ៉ាងឆាប់រហ័ស» ដោយសង្កត់ធ្ងន់ថា «ចំណាប់ថ្នូរ រួមទាំងជនជាតិអាល្លឺម៉ង់ ទីបំផុតត្រូវតែត្រលប់ទៅជួបជុំក្រុមគ្រួសាររបស់ពួកគេវិញ»។ លោកបានបន្ថែមថា «ជំនួយមនុស្សធម៌ត្រូវតែទៅដល់ប្រជាជននៅហ្កាហ្សាយ៉ាងឆាប់រហ័ស»។

ជាមួយគ្នានេះ មេដឹកនាំអាល្លឺម៉ង់រូបនេះ បានបញ្ជាក់ថា ប្រទេសរបស់លោកនឹងផ្តល់ជំនួយមនុស្សធម៌បន្ថែមចំនួន ២៩លានអឺរ៉ូ (៣៣,៦លានដុល្លារ) ហើយនឹងជួយដល់ «ការគាំទ្រផ្នែកវេជ្ជសាស្ត្រ និងផ្លូវចិត្តរបស់ចំណាប់ថ្នូរដែលត្រូវបានដោះលែង»៕