នៅថ្ងៃសុក្រនេះ ជនប៉ាឡេស្ទីនជម្លៀសខ្លួនរាប់ម៉ឺននាក់ បានចាប់ផ្តើមវិលត្រឡប់ទៅកាន់ផ្ទះសម្បែងបោះបង់ចោលរបស់ពួកគេវិញ ក្រោយបទឈប់បាញ់រវាងអ៊ីស្រាអែល និងក្រុមហាម៉ាសចូលជាធរមាន និងទាហានអ៊ីស្រាអែលចាប់ផ្តើមដកចេញពីតំបន់ជាច្រើននៅហ្កាហ្សា ។

ទំហំដ៏ច្រើននៃពលរដ្ឋហ្កាហ្សាជម្លៀសខ្លួន បានធ្វើដំណើរទៅកាន់តំបន់ភាគខាងជើងនៅតាមផ្លូវតំបន់ឆ្នេរឆ្ពោះទៅកាន់ទីក្រុងហ្កាហ្សា ដែលជាតំបន់ទីក្រុងធំជាងគេបំផុតនៅដែនដីបិទច្រកមួយនេះ និងស្ថិតក្រោមការវាយប្រហាររយៈពេលប៉ុន្មានថ្ងៃមុន អំឡុងការវាយប្រហារមួយក្នុងចំណោមការវាយប្រហារដ៏ខ្លាំងក្លាបំផុតរបស់អ៊ីស្រាអែល ។

ពលរដ្ឋស្ទើទាំងអស់នៅតំបន់ហ្កាហ្សា ត្រូវបានជម្លៀសខ្លួនដោយសារសង្រ្គាមដែលបានចាប់ផ្តើមកាលពីខែតុលា ឆ្នាំ ២០២៣ ក្រោយពេលក្រុមជីវពលដឹកនាំដោយក្រុមហាម៉ាសវាយប្រហារអ៊ីស្រាអែល និងបានសម្លាប់មនុស្សប្រហែល ១.២០០នាក់ ហើយនិងចាប់ចំណាប់ថ្នូរ ២៥១នាក់ ។

ដំណាក់កាលដំបូងនៃគំនិតផ្តួចផ្តើមរបស់ប្រធានាធិបតីសហរដ្ឋអាមេរិកលោក Donald Trump ដើម្បីបញ្ចប់សង្រ្គាមរយៈពេល ២ឆ្នាំនៅហ្កាហ្សា នឹងអំពាវនាវឲ្យកងកម្លាំងអ៊ីស្រាអែលដកចេញពីតំបន់មួយចំនួនក្នុងចំណោមតំបន់ទីក្រុងសំខាន់ៗនៅហ្កាហ្សា បើទោះបីជាពួកគេបន្តនៅគ្រប់គ្រងដែនដីមួយនេះ ប្រហែលពាក់កណ្តាលក៏ដោយ ។

នៅពេលដែលកិច្ចព្រមព្រៀងអនុវត្ត រថយន្តដឹកស្បៀងអាហារ និងជំនួយវេជ្ជសាស្រ្ត នឹងធ្វើដំណើរចូលទៅក្នុងតំបន់ហ្កាហ្សា ដើម្បីជួយជនស៊ីវិល រាប់ម៉ឺនរាប់សែននាក់ដែលជ្រកកោននៅក្នុងសំពត់តង់ ក្រោយកងកម្លាំងអ៊ីស្រាអែល បំផ្លិចបំផ្លាញផ្ទះសម្បែងរបស់ពួកគេ ៕