ឯកសាររបស់តុលាការ បានបង្ហាញជាសាធារណៈនៅថ្ងៃសុក្រ (ទី១០ ខែតុលា) នេះថា ចៅក្រមតុលាការព្រហ្មទណ្ឌអន្តរជាតិ (ICC) បានច្រានចោលសំណើរបស់មេធាវីការពារក្តី លោក Rodrigo Duterte ដែលស្នើសុំឲ្យដោះលែងអតីតប្រធានាធិបតីហ្វីលីពីនពីការឃុំខ្លួន ក្នុងអំឡុងពេលរង់ចាំការកាត់ក្តី។

មេធាវីរបស់បុរសក្នុងវ័យ ៨០ឆ្នាំ ឲ្យដឹងថា រូបលោកមិនសមឡើងសវនាការទេ ដោយសារតែការចុះខ្សោយសមត្ថភាពគិត និងចងចាំ ហើយបានស្នើសុំឲ្យមានការដោះលែងរូបគាត់ជាបណ្តោះអាសន្ន ដោយផ្អែកលើហេតុផលទាំងនោះ ក៏ដូចជាការលើកឡើង ដែលថា ជនចាប់ចោទនឹងមិនរត់គេច ឬបង្កផលប៉ះពាល់ដល់នីតិវិធីរបស់តុលាការនោះទេ។

តែចៅក្រមបានសម្រេចថា លោក Duterte ចាំបាច់ត្រូវស្ថិតនៅក្នុងមន្ទីរឃុំឃាំងរបស់ ICC នៅទីក្រុងឡាអេ ប្រទេសហូឡង់ ដើម្បីធានាបានថា លោកនឹងបង្ហាញខ្លួន សម្រាប់ដំណើរការកាត់ក្តី ហើយមិនធ្វើឲ្យប៉ះពាល់ដល់ការស៊ើបអង្កេតដែលកំពុងបន្តមានរបស់តុលាការ។

គួរបញ្ជាក់ថា លោក Duterte ត្រូវបានចាប់ខ្លួន និងនាំទៅកាន់ទីក្រុងឡាអេ កាលពីខែមីនា តាមដីកាចាប់ខ្លួន ដែលភ្ជាប់រូបលោកទៅនឹងអំពើឃាតកម្មដែលត្រូវបានប្រព្រឹត្ត ក្នុងអំឡុងពេលមាន «សង្គ្រាមប្រឆាំងគ្រឿងញៀន» របស់លោក នៅក្នុងប្រទេសហ្វីលីពីន ជាកន្លែងដែលអ្នកជួញដូរ និងអ្នកប្រើប្រាស់គ្រឿងញៀនរាប់ពាន់នាក់ត្រូវបានសម្លាប់។ លោកបានបញ្ជាក់ថា ការចាប់ខ្លួនលោក គឺខុសច្បាប់ ហើយដូចជាការចាប់ជំរិត៕