ក្នុងសេចក្តីថ្លែងការណ៍នាថ្ងៃសុក្រនេះ អ្នកនាំពាក្យយោធាអ៊ីស្រាអែលលោកឧត្តមសេនីយ៍ទោ Effie Defrin និយាយថា ក្រុមហាម៉ាសលែងជាក្រុមជីវពលទៀតហើយ ដែលការវាយប្រហាររបស់ពួកគេលើអ៊ីស្រាអែលបង្កឲ្យមានសង្រ្គាមរយៈពេល ២ឆ្នាំនៅតំបន់ហ្កាហ្សា ស្របពេលដែលបទឈប់បាញ់ជាមួយក្រុមជីវពលប៉ាឡេស្ទីនមួយនេះ ចាប់ផ្តើម ។

លោកថា ក្រុមហាម៉ាសត្រូវបានយកឈ្នះគ្រប់ទីកន្លែងដែលពួកយើងបានប្រយុទ្ធជាមួយពួកគេ ហើយលោកជំរុញឲ្យពលរដ្ឋហ្កាហ្សាចៀសវាងពីការចូលតំបន់គ្រប់គ្រងដោយកងកម្លាំងការពារអ៊ីស្រាអែលនៅដែនដីមួយនេះ ។

ជនប៉ាឡេស្ទីនរាប់ម៉ឺននាក់ ចាប់ផ្តើមធ្វើដំណើរត្រឡប់ទៅកាន់ផ្ទះសម្បែងបោះបង់ចោលរបស់ពួកគេវិញ ក្រោយបទឈប់បាញ់រៀបចំឡើងដោយសហរដ្ឋអាមេរិក បានចូលជាធរមាននៅថ្ងៃសុក្រនេះ ហើយទាហានអ៊ីស្រាអែលចាប់ផ្តើមដកចេញពីតំបន់មួយចំនួននៅហ្កាហ្សា ។

កិច្ចព្រមព្រៀងបញ្ជាក់ថា ក្នុងរយៈពេល ២៤ម៉ោងនៃការចាប់ផ្តើមបទឈប់បាញ់ដែលចាប់ផ្តើមនៅថ្ងៃត្រង់ ម៉ោងក្នុងស្រុក ថ្ងៃសុក្រ យោធាអ៊ីស្រាអែលនឹងដកចេញពីខ្សែបន្ទាត់យល់ព្រម ដើម្បីកាត់បន្ថយការរង្គៀសចិត្តជាមួយជនស៊ីវិលហ្កាហ្សា ។

ខ្សែបន្ទាត់ដកទ័ពនឹងត្រូវដកកម្លាំងអ៊ីស្រាអែលចេញពីតំបន់ទីក្រុងសំខាន់របស់ហ្កាហ្សា ប៉ុន្តែពួកគេនៅបន្តគ្រប់គ្រងដែនដីមួយនេះ ប្រហែលពាក់កណ្តាល ៕