សារព័ត៌មានក្នុងស្រុករាយការណ៍ថា ការផ្ទុះជាបន្តបន្ទាប់ និងការផ្ទុះអាវុធ បានអង្រួនរដ្ឋធានីកាប៊ុល ប្រទេសអាហ្វហ្គានីស្ថាន កាលពីយប់ថ្ងៃព្រហស្បតិ៍ ។ មូលហេតុនៃការផ្ទុះ ហើយនិងទំហំនៃគ្រោះថ្នាក់ នៅពុំទាន់ដឹងច្បាស់នោះទេ ។

អ្នកនាំពាក្យរដ្ឋាភិបាលតាលីបង់លោក Zabihullah Mujahid បានបញ្ជាក់ថា ការផ្ទុះត្រូវបានឮនៅក្នុងទីក្រុងកាប៊ុល ហើយមូលហេតុនៃការផ្ទុះកំពុងស្ថិតក្រោមការស៊ើបអង្កេត ។

លោកបានបង្ហោះសារនៅលើបណ្តាញព័ត៌មានសង្គម Xថា ការផ្ទុះមួយត្រូវបានឮនៅក្នុងទីក្រុងកាប៊ុល ប៉ុន្តែកុំព្រួយបារម្ភ វាមិនកើតមានរឿងអ្វីនោះទេ ។ ឧបទ្ទេវហេតុនេះ កំពុងស្ថិតក្រោមការស៊ើបអង្កើត ហើយគ្មានអ្នករងរបួស ត្រូវបានរាយការណ៍នៅឡើយនោះទេ ។ មកទល់នឹងពេលនេះ គ្មានសេចក្តីរាយការណ៍ពីការប៉ះពាល់ណាមួយទេ ។

ឧបទ្ទេវហេតុនេះដែរ បានកើតមានឡើងស្របពេលមានទំនាក់ទំនងកាន់តែអាក្រក់រវាងអាហ្វហ្គានីស្ថាន និងប៉ាគីស្ថានដែលបានចោទប្រកាន់រដ្ឋាភិបាលតាលីបង់ថា បានផ្តល់កន្លែងសុវត្ថិភាពដល់ក្រុមប្រដាប់អាវុធ ជាពិសេសក្រុមជីវពល TTP ដែលទីក្រុង Islamabad ដាក់ការស្តីបន្ទោសសម្រាប់ការហក់ឡើងខ្ពស់ការវាយប្រហារលើកងកម្លាំងសន្តិសុខរបស់ពួកគេ ។

ការផ្ទុះខាងលើ បានកើតឡើងគាប់ជួនផងដែរនឹងការទៅដល់របស់រដ្ឋមន្រ្តីការបរទេសអាហ្វហ្គានីស្ថានតាលីបង់លោក Amir Khan Muttaqi នៅឥណ្ឌាសម្រាប់ដំណើរទស្សនកិច្ចរយៈពេល ៦ថ្ងៃ ដែលជាដំណើរទស្សនកិច្ចលើកដំបូង ចាប់តាំងពីការវិលត្រឡប់មកកាន់អំណាចវិញរបស់ក្រុមតាលីបង់ ៕