មេដឹកនាំក្រុមឧទ្ទាមហ៊ូធីយេម៉ែនលោក Abdul-Malik al-Houthi និយាយថា ក្រុមរបស់លោកនឹងតាមដានការអនុវត្តកិច្ចព្រមព្រៀងបទឈប់បាញ់ហ្កាហ្សារបស់អ៊ីស្រាអែល ហើយនិងចាប់ផ្តើមគាំទ្រតំបន់ហ្កាហ្សាឡើងវិញ បើសិនជាអ៊ីស្រាអែលពុំបានអនុវត្តតាម ។

លោក al-Houthi និយាយនៅក្នុងសុន្ទរកថាចាក់ផ្សាយលើកញ្ចក់ទូរទស្សន៍ថា ពួកយើងនៅតែជារដ្ឋមានការប្រុងប្រយ័ត្នខ្ពស់ និងត្រៀមខ្លួនពេញទំហឹង តាមដានការអនុវត្តដំណាក់កាលកិច្ចព្រមព្រៀងមួយនេះ ។

មេដឹកនាំក្រុមឧទ្ទាមហ៊ូធីរូបនេះ បន្តប្រុងប្រយ័ត្នចំពោះសាមគ្គីភាពជាមួយជនប៉ាឡេស្ទីន ដោយលោកនិយាយថា ក្រុមរបស់លោកនឹងសម្រេចចិត្តលើជំហានបន្ទាប់របស់ខ្លួន ដោយផ្អែកលើហេតុផលថាតើបទឈប់បាញ់ បានផ្តល់លទ្ធផលជាក់ស្តែងដែរឬទេ ។

អ៊ីស្រាអែល និងក្រុមជីវពលប៉ាឡេស្ទីនហាម៉ាស បានចុះហត្ថលេខាលើកិច្ចព្រមព្រៀងកាលពីថ្ងៃព្រហស្បតិ៍ សម្រាប់បទឈប់បាញ់ និងការដោះលែងចំណាប់ថ្នូរជាការដោះដូរអ្នកទោសប៉ាឡេស្ទីន ក្នុងដំណាក់កាលដំបូងនៃគំនិតផ្តួចផ្តើមរបស់ប្រធានាធិបតីសហរដ្ឋអាមេរិកលោក Donald Trump ដើម្បីបញ្ចប់សង្រ្គាមរយៈពេល ២ឆ្នាំនៅតំបន់ហ្កាហ្សា ដែលបានធ្វើឲ្យក្រឡាប់ចាក់តំបន់មជ្ឈិមបូព៌ា ។

បើសិនជាកិច្ចព្រមព្រៀងនេះ ត្រូវបានអនុវត្តទាំងស្រុង នឹងធ្វើឲ្យភាគីទាំង ២ ខិតជិតជាងកិច្ចខិតខំលើកមុន ដើម្បីបញ្ឈប់សង្រ្គាមដែលបានធ្វើឲ្យអ៊ីស្រាអែលកាន់តែឯកាខ្លាំងលើឆាកអន្តរជាតិ ហើយនិងវិវត្តទៅជាជម្លោះក្នុងតំបន់នាំឲ្យមានការជាប់ពាក់ព័ន្ធពីអ៊ីរ៉ង់ យេម៉ែន និងលីបង់ ៕