អង្គការសប្បុរសធម៌កុមាររបស់អង្គការសហប្រជាជាតិ(UNICEF) បានអំពាវនាវកាលពីថ្ងៃសុក្រ ទី១០ តុលា សម្រាប់ការឆ្លងកាត់ជំនួយស្បៀងអាហារទាំងអស់ចូលទៅក្នុងតំបន់ហ្កាហ្សាដែលខ្ទេចខ្ទាំដោយសង្រ្គាមត្រូវតែបានបើកចំហរ ដោយនិយាយថាអ្នកស្លាប់ក្នុងចំណោមកុមារអាចកើនឡើងដោយសារតែប្រព័ន្ធភាពស៊ាំរបស់ពួកគេត្រូវបានបាត់បង់ធ្ងន់ធ្ងរ។

អ្នកនាំពាក្យអង្គការ UNICEF លោក Ricardo Pires បាននិយាយថា «ស្ថានភាពគឺធ្ងន់ធ្ងរខ្លាំង។ យើងប្រឈមការមើលឃើញការកើនឡើងយ៉ាងច្រើននៃការស្លាប់របស់កុមារ មិនត្រឹមតែទារកទើបនឹងកើតប៉ុណ្ណោះទេ ថែមទាំងកុមារផងដែរ ដោយសារតែប្រព័ន្ធការពាររបស់ពួកគេត្រូវបានបាត់បង់ជាងពេលមុនៗ»។

ទាហានអ៊ីស្រាអែល បានចាប់ផ្តើមដកថយពីផ្នែកមួយចំនួននៅលើដែនដីប៉ាឡេស្ទីនកាលពីថ្ងៃសុក្រ ក្រោមកិច្ចព្រមព្រៀងឈប់បាញ់ជាមួយក្រុមហាម៉ាស ក្នុងដំណាក់កាលដំបូងនៃគំនិតផ្តួចផ្តើមរបស់ប្រធានាធិបតីសហរដ្ឋអាមេរិកលោក Donald Trump ដើម្បីបញ្ចប់សង្រ្គាមដែលមានរយៈពេលពីរឆ្នាំ។ មន្ត្រីអង្គការសហប្រជាជាតិបាននិយាយថា ស្ថាប័ននេះមានផែនការបង្កើនការដឹកជញ្ជូនជំនួយមនុស្សធម៌ ចូលទៅកាន់តំបន់ហ្កាហ្សា ជាកន្លែងដែលតំបន់មួយចំនួនកំពុងជួបប្រទះគ្រោះទុរ្ភិក្ស ក្នុងរយៈពេល៦០ថ្ងៃដំបូងនៃបទឈប់បាញ់នៅក្នុងតំបន់ហ៊ុមព័ទ្ធមួយនេះ។ អង្គការ UNICEF បាននិយាយថា ការគាំទ្រផ្នែកអាហារូបត្ថម្ភគឺជាអាទិភាពចម្បង ដោយមានកុមារចំនួន ៥០.០០០នាក់ប្រឈមកង្វះអាហារូបត្ថម្ភយ៉ាងស្រួចស្រាវ និងត្រូវការការព្យាបាលបន្ទាន់។ លោក Pires បាននិយាយថា ភាពស៊ាំរបស់កុមារមានកម្រិតទាបខ្លាំងដោយសារតែ«ពួកគេមិនបានទទួលទានអាហារសមស្រប ហើយត្រូវធ្វើដំណើរឆ្ងាយ» ។

លោកបាននិយាយបន្ថែមថា «កុមារត្រូវមានវីតាមីន និងសារធាតុចិញ្ចឹមត្រឹមត្រូវ ដើម្បីវិវឌ្ឍ និងអាចទប់ទល់ទៅនឹងការផ្លាស់ប្តូរសីតុណ្ហភាព ឬការផ្ទុះឡើងវីរុស»។