​NATO៖ អង្គការ​ NATO កំពុង​ធ្វើ​សមយុទ្ធ​នៅ​សមុទ្រ​មេ​ឌី​ទែ​រ៉ា​ណេ និង Adriatic ដោយ​បញ្ជូន​យន្តហោះ​ចម្បាំង F-18 ទៅកាន់​អឺរ៉ុប​ខាងជើង​ហោះ​លើ​រដ្ឋបាល់​ទិ​ក ប៉ូឡូញ រូ​ម៉ា​នី និង​ចុះទៅ​សមុទ្រ Ionian ជាប់​ប្រទេស​ក្រិ​ក​។ ​ជា​ផ្នែក​មួយ​នៃ​ប្រតិបត្តិការ Neptune Strike 2022 ក្រុម​នាវា​ផ្ទុក​យន្តហោះ​អាមេរិកដឹកនាំ​ដោយនាវា​ USS Truman និង​ធ្វើការ​ជាមួយ​យោធា​អ៊ីតាលី ក្រិ​ក អាល្លឺម៉ង់ និង​អេ​ស្ប៉ា​ញកំពុង​ប្រើ​យន្ត​ហោះ​ចាក់​ប្រេង​លើ​អាកាស ​ដើម្បី​បញ្ជូន​យន្តហោះ​ចម្បាំង​ពី​នាវា​ផ្ទុក​យន្តហោះ​ទៅអឺរ៉ុប​ខាងជើង​។

​ខណៈដែល​ប្រតិបត្តិការ Neptune Strike ត្រូវបាន​គ្រោងទុក​មុន​វិបត្តិ​អ៊ុយ​ក្រែ​ន អង្គការ NATO ទំនងជា​កំពុង​ពង្រីក​សាច់ដុំ​របស់ខ្លួន ដែលជា​ផ្នែក​នៃ​កិច្ចខិតខំ​ប្រឹងប្រែង​រប​ស់​ទីក្រុង​វ៉ាស៊ីនតោន ដើម្បីបង្ហាញ​ពី​ការតាំង​ចិត្ត​របស់ខ្លួន​ក្នុងការ​ប្រឈមមុខ​ជាមួយ​ទីក្រុង​មូ​ស្គូ​។​ ​អង្គការ​ NATO ​បាន​បង្កើន​ការការពារ​របស់ខ្លួន​ ជុំវិញ​សម្ព័ន្ធមិត្ត​នៅ​អឺរ៉ុប​ខាងកើត​ចាប់តាំងពី​ចុងឆ្នាំ​មុន​។​ ​ជា​ឧទាហរណ៍ ប្រទេស​ដា​ណឺ​ម៉ាក​បាននិយាយថា ខ្លួន​កំពុង​បញ្ជូន​នាវាចម្បាំង និង​យន្តហោះ​ចម្បាំង F-16 ទៅកាន់​ប្រទេស​លី​ទុយ​អា​នី ហើយ​អេ​ស្ប៉ា​ញ​កំពុង​បញ្ជូន​យន្តហោះ​ចម្បាំង​ចំនួន ៤គ្រឿងទៅកាន់​ប៊ុលហ្គារី និង​នាវា​ចំនួន ៣គ្រឿង​ទៅកាន់​សមុទ្រ​ខ្មៅ ដើម្បី​ចូលរួម​ជាមួយ​កង​នាវាចរ​របស់អង្គការ NATO​​។ ប្រទេស​ហូ​ឡង់​គ្រោង​នឹង​បញ្ជូន​យន្តហោះ​ចម្បាំង F-25 ទៅកាន់​ប្រទេស​ប៊ុលហ្គារីក្នុង​ខែមេសា ហើយ​កំពុង​ត្រៀម​នាវា និង​អង្គភាព​ដែលមាន​មូលដ្ឋាន​នៅលើ​ដីគោក​ សម្រាប់កងកម្លាំង​ឆ្លើយតប​របស់​អង្គការ​ NATO​។ ចលនា​យោធា​បាន​កើតឡើង​ ស្របពេល​មានការ​ជាប់គាំង​កិច្ចចរចា​ជាមួយ​រុស្ស៊ី​ ជុំវិញ​ការបង្កើន​កម្លាំងទ័ព​នៅ​ព្រំដែន​អ៊ុយ​ក្រែ​ន​។ ហើយ​ពួកគេ​គូសបញ្ជាក់​ពី​ការភ័យខ្លាច​ដែល​កំពុង​កើនឡើង​នៅ​ទូទាំង​អឺរ៉ុប​ដែលថា លោក​ប្រធានាធិបតី​រុស្ស៊ី Putin ត្រៀមខ្លួន​ចូល​ឈ្លានពាន​អ៊ុយ​ក្រែ​ន​៕

អត្ថបទ៖ សុខមាន