សមាជិកក្រុមប្រឹក្សាសន្តិសុខអង្គការសហប្រជាជាតិ (UNSC) កាលពីថ្ងៃសុក្រ (ទី១០ ខែតុលា) បានបង្ហាញក្ដីបារម្ភ ជុំវិញការកើនឡើងនូវតានតឹង រវាងសហរដ្ឋអាមេរិក និងវ៉េណេស៊ុយអេឡា ដោយរុស្ស៊ីបានចោទប្រកាន់ក្រុងវ៉ាស៊ីនតោនថា បានប្រើប្រាស់ទ្រឹស្តី «ក្មេងគង្វាលគោ» បាញ់មុន ពោលគឺអនុវត្តវិធានការយ៉ាងឆាប់រហ័សដោយមិនគិតគូរឲ្យបានដិតដល់ ក្នុងការវាយប្រហារទូក ដែលត្រូវបានចោទប្រកាន់ថា ដឹកគ្រឿងញៀន។

លោក Vassily Nebenzia ឯកអគ្គរដ្ឋទូតរបស់ប្រទេសរុស្ស៊ី ប្រចាំនៅអង្គការសហប្រជាជាតិ (UN) បានប្រាប់កិច្ចប្រជុំនៃ UNSC ដែលមានសមាជិកទាំង ១៥ប្រទេសថា ប្រទេសវ៉េណេស៊ុយអេឡា មានគ្រប់ហេតុផល ក្នុងការជឿថា សហរដ្ឋអាមេរិកបានត្រៀមខ្លួនរួចជាស្រេច ដើម្បីចាត់វិធានការ ពីការគំរាមកំហែងឲ្យទៅជាសកម្មភាពជាក់ស្ដែងប្រឆាំងនឹងខ្លួន។

បណ្ដាប្រទេសដែលរួមមានសម្ព័ន្ធមិត្តរបស់សហរដ្ឋអាមេរិក គឺបារាំង ក្រិក និងដាណឺម៉ាក បានអំពាវនាវឲ្យមានការបន្ធូរបន្ថយ និងកិច្ចពិភាក្សា ដើម្បីដោះស្រាយភាពតានតឹង និងប្រកាន់ខ្ជាប់នូវច្បាប់អន្តរជាតិ។

គួរបញ្ជាក់ថា សហរដ្ឋអាមេរិកបានវាយប្រហារលើទូកជាច្រើនគ្រឿងដែលត្រូវបានចោទថា បានដឹកគ្រឿងញៀន នៅឆ្នេរសមុទ្រវ៉េណេស៊ុយអេឡា ក្នុងរយៈពេលប៉ុន្មានសប្តាហ៍ថ្មីៗនេះ។ តំណាងសហរដ្ឋអាមេរិកប្រចាំកិច្ចប្រជុំ UN លោក John Kelly បាននិយាយថា៖ «ទីក្រុងវ៉ាស៊ីនតោន នឹងមិនចាត់វិធានការដោយរារែក ដើម្បីការពារជាតិរបស់យើងពីពួកភេរវករគ្រឿងញៀននោះឡើយ»។

លោក Nebenzia បានប្រាប់ថា ប្រទេសរុស្ស៊ីបានថ្កោលទោសការវាយប្រហារនេះថា ជាការរំលោភច្បាប់អន្តរជាតិ និងសិទ្ធិមនុស្ស ដោយបន្ថែមថា «ទូកដែលមនុស្សនៅលើនោះត្រូវបានបាញ់ នៅដែនសមុទ្រអន្តរជាតិ ដោយគ្មានការកាត់ក្ដី ឬការស៊ើបអង្កេតអ្វីឡើយ»។ លោកបានបញ្ជាក់បន្ថែមថា វិធានការនេះត្រូវបានធ្វើឡើងតាមទ្រឹស្តីក្មេងគង្វាលគោ «បាញ់មុន»៕