ក្រសួងការបរទេសរបស់ប្រទេសម៉ាឡេស៊ី បានឲ្យដឹងថា របបយោធាមីយ៉ាន់ម៉ា បានអញ្ជើញសមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ឲ្យបញ្ជូនអ្នកសង្កេតការណ៍ទៅកាន់ការបោះឆ្នោត ដែលគ្រោងទុកនៅចុងឆ្នាំ ហើយប្លុកនេះ នឹងពិភាក្សាអំពីសំណើនេះ ក្នុងអំឡុងពេលមានកិច្ចប្រជុំកំពូលថ្នាក់តំបន់ នៅចុងខែនេះ។

នៅក្នុងសេចក្តីថ្លែងការណ៍មួយកាលពីយប់ថ្ងៃសុក្រ (ទី១០ ខែតុលា) ក្រសួងបានបញ្ជាក់ថា ការអញ្ជើញឲ្យបញ្ជូនអ្នកសង្កេតការណ៍បោះឆ្នោត ត្រូវបានស្នើទៅរដ្ឋជាសមាជិកអាស៊ានទាំងអស់ ។

ក្រសួងបានឲ្យដឹងថា៖ «រដ្ឋមន្ត្រីការបរទេសបានកត់សម្គាល់ថា ការអញ្ជើញត្រូវបានស្នើទៅរដ្ឋជាសមាជិកអាស៊ាន ដើម្បីឲ្យបញ្ជូនអ្នកសង្កេតការណ៍ការបោះឆ្នោត។ សម្រាប់ម៉ាឡេស៊ី ការអញ្ជើញនេះ ត្រូវបានបញ្ជូនទៅកាន់គណៈកម្មការរៀបចំការបោះឆ្នោតរបស់ប្រទេសម៉ាឡេស៊ី»។

យ៉ាងណាក្ដីនេះ សេចក្តីថ្លែងការណ៍នេះមិនបានសំដៅទៅសេចក្ដីរាយការណ៍ពីប្រព័ន្ធផ្សព្វផ្សាយរដ្ឋរបស់មីយ៉ាន់ម៉ា កាលពីថ្ងៃសុក្រនោះឡើយ ដែលថា ម៉ាឡេស៊ីនឹងបញ្ជូនក្រុមអ្នកសង្កេតការណ៍ទៅកាន់ការបោះឆ្នោតសកលដ៏ចម្រូងចម្រាស ដែលគ្រោងនឹងធ្វើឡើងជាដំនាក់ ដោយចាប់ផ្តើមនៅថ្ងៃទី២៨ ខែធ្នូ។

គួរបញ្ជាក់ថា ការប្រកាសនេះបានកើតឡើងបន្ទាប់ពីមានកិច្ចពិភាក្សា រវាងប្រមុខរបបយោធាមីយ៉ាន់ម៉ា លោក Min Aung Hlaing និងរដ្ឋមន្ត្រីការបរទេសម៉ាឡេស៊ី លោក Mohamad Hasan នៅរដ្ឋធានី Naypyitaw ប្រទេសមីយ៉ាន់ម៉ា កាលពីថ្ងៃព្រហស្បតិ៍៕