ប្រព័ន្ធផ្សព្វផ្សាយបានរាយការណ៍ថា គណបក្សប្រឆាំងដ៏ធំបំផុតរបស់ប្រទេសជប៉ុន នឹងស្វែងរកការគាំទ្របេក្ខជនបង្រួបបង្រួមមួយរូបជាមួយក្រុមផ្សេងទៀត ជាការប៉ុនប៉ងរារាំងដល់ការបោះឆ្នោតតែងតាំងលោកស្រី Sanae Takaichi ជានាយករដ្ឋមន្ត្រី បន្ទាប់ពីក្រុមចម្រុះកំពុងកាន់អំណាច បានដួលរលំ។

គណបក្សតូច Komeito បានដកខ្លួនចេញសម្ព័ន្ធភាពរយៈពេល ២៦ឆ្នាំរបស់ខ្លួន ជាមួយគណបក្សប្រជាធិបតេយ្យសេរីនិយម (LDP) ដែលកំពុងកាន់អំណាច កាលពីថ្ងៃសុក្រ (ទី១០ ខែតុលា) ដោយធ្វើឲ្យមានហានិភ័យដល់កិច្ចប្រឹងប្រែងរបស់លោកស្រី Takaichi ដើម្បីបានក្លាយជានាយករដ្ឋមន្ត្រីស្ត្រីដំបូងរបស់ប្រទេស។

អ្នកនយោបាយអភិរក្សនិយម លោកស្រី Takaichi ត្រូវបានជ្រើសរើសជាប្រមុខគណបក្ស LDP ថ្មី កាលពីមួយសប្តាហ៍មុន ប៉ុន្តែត្រូវការការអនុម័តពីសភា ដើម្បីទទួលបានតួនាទីកំពូលដឹកនាំប្រទេស។

សារព័តមាន Nikkei បានរាយការណ៍កាលពីយប់ថ្ងៃសុក្រថា ប្រធានគណបក្សប្រជាធិបតេយ្យធម្មនុញ្ញជប៉ុន (CDP) ដែលជាគណបក្សប្រឆាំងដ៏ធំ គឺលោក Yoshihiko Noda បានប្រាប់ថា៖ «នេះជាឱកាសមួយ ដែលកើតឡើងម្ដងរយៈពេល ១ទសវត្សរ៍ ដើម្បីឲ្យមានការផ្លាស់ប្តូររដ្ឋាភិបាល»។

ដោយបាននិយាយអំឡុងកិច្ចសម្ភាសន៍ជាផតឃែស្ថជាមួយ Nikkei ដែលមិនទាន់ត្រូវបានចេញផ្សាយនៅឡើយ លោក Noda បានបញ្ជាក់ថា លោកនឹងជំរុញឲ្យគណបក្សប្រឆាំងរួបរួមគ្នាគាំទ្របេក្ខជនតែមួយ។ លោកបានបន្ថែមថា បុគ្គលនោះ អាចជាលោក Yuichiro Tamaki ដែលជាប្រធានគណបក្សប្រជាធិបតេយ្យ ដើម្បីប្រជាជន (DPP) និងដែលបាននិយាយកាលពីថ្ងៃសុក្រថា លោកសុខចិត្តឈរឈ្មោះ។

តែយ៉ាងណាក្ដី ការមានភាពខុសគ្នាខាងគោលនយោបាយសំខាន់ៗ រវាងគណបក្ស DDP និង CDP បើតាមការរាយការណ៍ អាចបំផ្លាញកិច្ចសហការនេះ។

គួរបញ្ជាក់ថា ការសម្រេចរបស់គណបក្ស Komeito ក្នុងការចាកចេញពីសម្ព័ន្ធភាពដែលបានគ្រប់គ្រងប្រទេសជប៉ុន ដោយស្ទើរតែគ្មានឧបសគ្គអ្វីសោះអស់រយៈពេល ២៥ឆ្នាំមកហើយនោះ បានរុញឲ្យប្រទេសជប៉ុនធ្លាក់ចូលទៅក្នុងវិបត្តិនយោបាយថ្មី៕