អ៊ីស្រាអែលនឹងអនុញ្ញាតឲ្យអង្គការសហប្រជាជាតិ (UN) ផ្តល់ជំនួយមនុស្សធម៌ ក្នុងបរិមាណកាន់តែច្រើនទៅកាន់តំបន់ហ្កាហ្សាស្ទ្រីប ចាប់ពីថ្ងៃសៅរ៍ (ទី១១ ខែតុលា) នេះ។ នេះបើយោងតាមមន្ត្រីជាន់ខ្ពស់ UN ដែលបាននិយាយក្នុងលក្ខខណ្ឌមិនបញ្ចេញឈ្មោះ ក្នុងការពន្យល់អំពីផែនការនេះ។

កិច្ចព្រមព្រៀងបទឈប់បាញ់ដែលបានឈនដល់កាលពីថ្ងៃទី៩ ខែតុលា រវាងអ៊ីស្រាអែល និងក្រុមហាម៉ាស់ មានលក្ខខណ្ឌឲ្យបង្កើនជំនួយទៅកាន់តំបន់ហ្កាហ្សា និងបើកឡើងវិញនូវច្រកព្រំដែន Rafah ជាមួយប្រទេសអេហ្ស៊ីប។

UN បានឲ្យដឹងថា ស្បៀងអាហារ ថ្នាំពេទ្យ និងការផ្គត់ផ្គង់ជំនួយផ្សេងទៀតប្រហែល ១៧០.០០០តោន ត្រូវបានរៀបចំ ហើយត្រៀមជាស្រេច ដើម្បីដឹកជញ្ជូនចូលទៅក្នុងតំបន់នោះ។ អ្នកនាំពាក្យ UN លោក Stephane Dujarric បាននិយាយថា ស្ថាប័នកំពុងចរចាជាមួយអាជ្ញាធរអ៊ីស្រាអែល ដើម្បីបង្កើនបរិមាណ និងភាពញឹកញាប់នៃការផ្ដល់ជំនួយចូលទៅកាន់តំបន់ហ្កាហ្សា និងដើម្បីបើកច្រកឆ្លងកាត់បន្ថែមទៀត។

គួរបញ្ជាក់ថា តំបន់ហ្កាហ្សាកំពុងរួបរឹតដោយវិបត្តិមនុស្សធម៌ធ្ងន់ធ្ងរ ដោយភាពអត់ឃ្លានរីករាលដាល ទ្រព្យសម្បត្តិត្រូវបានបំផ្លិចបំផ្លាញយ៉ាងធំធេង ហើយប្រជាជនភាគច្រើននៃចំនួន ២លាននាក់ បានផ្លាស់ទីលំនៅម្តងហើយម្តងទៀត អំឡុងសង្គ្រាម ២ឆ្នាំកន្លងមកនេះ។ ដែនដីនេះស្ថិតក្នុងស្ថានភាពក្រីក្ររួចហើយ មុនពេលសង្រ្គាមផ្ទុះឡើង ហើយការផ្គត់ផ្គង់ស្បៀងអាហារ និងជំនួយផ្សេងទៀត ត្រូវបានកាត់បន្ថយយ៉ាងខ្លាំងចាប់តាំងពីជម្លោះបានចាប់ផ្តើមកើតឡើង ដែលធ្វើឲ្យអ្វីៗកាន់តែអាក្រក់ទៅៗ។

អ្នកនាំពាក្យរបស់ទីភ្នាក់ងារ UN ដែលផ្តល់ជំនួយដល់ជនភៀសខ្លួនប៉ាឡេស្ទីន UNRWA គឺលោកស្រី Juliette Touma បាននិយាយថា៖ «ក្រុមរបស់យើងបានត្រៀមខ្លួនរួចរាល់ហើយ។ យើងគ្រាន់តែត្រូវការការអនុញ្ញាត ដើម្បីបើករថយន្តដឹកទំនិញទាំងនោះចូលតែប៉ុណ្ណោះ ដើម្បីឲ្យបុគ្គលិករបស់យើងអាចផ្តល់ជំនួយដោយផ្ទាល់ដល់មនុស្សដែលត្រូវការជំនួយយ៉ាងខ្លាំង»៕