ក្រុមតាលីបង់ប៉ាគីស្ថាន នៅថ្ងៃសៅរ៍ (ទី១១ ខែតុលា) នេះ បានអះអាងទទួលខុសត្រូវ ចំពោះការវាយប្រហារបង្ហូរឈាម នៅតំបន់ភាគពាយព្យជាច្រើន ជាហេតុការណ៍ដែលបានសម្លាប់យ៉ាងហោចណាស់មន្ត្រីសន្តិសុខ ២០នាក់ និងជនស៊ីវិល ៣នាក់។

ការវាយប្រហារដែលរាប់បញ្ចូលទាំងការបំផ្ទុះគ្រាប់បែកអត្តឃាតទៅលើសាលាហ្វឹកហ្វឺននគរបាលមួយ ត្រូវបានធ្វើឡើងកាលពីថ្ងៃសុក្រ នៅក្នុងតំបន់ជាច្រើននៃខេត្ត Khyber Pakhtunkhwa ដែលមានព្រំប្រទល់ជាប់ប្រទេសអាហ្វហ្គានីស្ថាន។

សកម្មភាពរបស់ក្រុមសកម្មប្រយុទ្ធ បានកើនឡើងខ្លាំងទៅៗនៅក្នុងខេត្ត Khyber Pakhtunkhwa ចាប់តាំងពីមានការដកទ័ពដឹកនាំដោយសហរដ្ឋអាមេរិកពីប្រទេសជិតខាងអាហ្វហ្គានីស្ថាន ក្នុងឆ្នាំ២០២១ និងការវិលត្រលប់របស់រដ្ឋាភិបាលតាលីបង់ នៅទីក្រុងកាប៊ុល។

មន្ត្រីបានឲ្យដឹងថា ទាហានប៉ារ៉ាចំនួន ១១នាក់ ត្រូវបានសម្លាប់នៅក្នុងតំបន់ព្រំដែន Khyber ខណៈនគរបាល ៧រូប ត្រូវបានសម្លាប់បន្ទាប់ពីអ្នកបំផ្ទុះគ្រាប់បែកអត្តឃាត បានបើករថយន្តផ្ទុកគ្រឿងផ្ទុះចូលទៅក្នុងច្រកទ្វារនៃសាលាហ្វឹកហ្វឺននគរបាល ដែលតាមមកដោយដោយការវាយប្រហារដោយកាំភ្លើង។

ជាមួយគ្នានេះ មន្ត្រីសន្តិសុខបានប្រាប់បណ្ដាញសារព័ត៌មាននៅថ្ងៃសៅរ៍នេះថា មនុស្ស ៥នាក់ រួមទាំងជនស៊ីវិល ៣នាក់ ត្រូវបានសម្លាប់នៅក្នុងការប៉ះទង្គិចដាច់ដោយឡែកមួយទៀត នៅក្នុងតំបន់ Bajaur។

ក្រុមតាលីបង់ប៉ាគីស្ថាន គឺក្រុម Tehreek-e-Taliban (TTP) បានអះអាងទទួលខុសត្រូវ ចំពោះការវាយប្រហារនានា តាមរយៈការបង្ហោះសារនៅលើបណ្ដាញសង្គម។ គួរដឹងថា ក្រុមនេះគឺជាក្រុមដាច់ដោយឡែក ប៉ុន្តែមានទំនាក់ទំនងយ៉ាងជិតស្និទ្ធជាមួយក្រុមតាលីបង់អាហ្វហ្គានីស្ថាន៕