រដ្ឋមន្ត្រីការពារជាតិអាមេរិក លោក Pete Hegseth កាលពីថ្ងៃព្រហស្បតិ៍ (ទី១០ ខែតុលា) បានប្រកាសថា ប្រទេសកាតានឹងត្រូវបានអនុញ្ញាតឲ្យសាងសង់ទីតាំងទ័ពអាកាស នៅមូលដ្ឋានទ័ពអាកាស Mountain Home ក្នុងរដ្ឋ Idaho ជាទីដែលនឹងរក្សាយន្តហោះចម្បាំង F-15 និងជាកន្លែងស្នាក់របស់អាកាសយានិក។

ការប្រកាសនេះកើតឡើងភ្លាមៗបន្ទាប់ពីលោកប្រធានាធិបតីអាមេរិក Donald Trump បានចុះហត្ថលេខាលើក្រឹត្យមួយ ដោយប្តេជ្ញាការពាររដ្ឋឈូងសមុទ្រអារ៉ាប់មួយនេះប្រឆាំងនឹងការវាយប្រហារនានា បន្ទាប់ពីមានការវាយប្រហារតាមអាកាសរបស់អ៊ីស្រាអែល ដែលដាក់គោលដៅទៅលើមេដឹកនាំក្រុមហាម៉ាស នៅក្នុងរដ្ឋធានីដូហា ប្រទេសកាតា។

ដោយមានរដ្ឋមន្ត្រីការពារជាតិកាតា លោក Sheikh Saoud bin Abdulrahman Al-Thani នៅក្បែរនោះ លោក Hegseth បាននិយាយនៅឯមន្ទីរបញ្ចកោណថា៖ «យើងកំពុងចុះហត្ថលេខាលើលិខិតទទួលស្គាល់ ដើម្បីសាងសង់ទីតាំងកងទ័ពអាកាសកាតា Emiri នៅមូលដ្ឋានទ័ពអាកាស Mountain Home ក្នុងរដ្ឋ Idaho»។

លោកបានបន្តថា៖ «ទីតាំងនេះនឹងជាកន្លែងរក្សាទុកយន្តហោះចម្បាំង F-15 របស់ប្រទេសកាតា និងការស្នាក់នៅរបស់អ្នកបើកយន្តហោះ ដើម្បីបង្កើនការហ្វឹកហ្វឺនរួមគ្នារបស់យើង ក៏ដូចជាបង្កើនសមត្ថភាពប្រយុទ្ធ និងសហប្រតិបត្តិការឲ្យកាន់តែរលូន»។

លោករដ្ឋមន្ត្រីរូបនេះ បានបញ្ជាក់បន្ថែមថា៖ «នេះគ្រាន់តែជាឧទាហរណ៍មួយទៀតនៃភាពជាដៃគូរបស់យើង ហើយខ្ញុំសង្ឃឹមថា អ្នកដឹងថា អ្នកអាចពឹងផ្អែកលើពួកយើង»។

ជាមួយគ្នានេះ លោក Hegseth ក៏បានថ្លែងអំណរគុណដល់ប្រទេសកាតា សម្រាប់ «តួនាទីដ៏សំខាន់» របស់ខ្លួន ក្នុងនាមជាអ្នកសម្រុះសម្រួលក្នុងកិច្ចចរចា ដែលនាំទៅរកបទឈប់បាញ់ និងកិច្ចព្រមព្រៀងដោះដូរអ្នកទោស និងចំណាប់ថ្នូរ រវាងអ៊ីស្រាអែល និងក្រុមហាម៉ាស ហើយនិងជំនួយរបស់ប្រទេសនេះ ក្នុងការធានាឲ្យមានការដោះលែងពលរដ្ឋអាមេរិកពីអាហ្វហ្គានីស្ថាន៕