នៅឯកន្លែងប្រមូលផ្ដុំរបស់មនុស្សជាច្រើន បេសកជនអាមេរិក លោក Steve Witkoff បាននិយាយថា ចំណាប់ថ្នូរអ៊ីស្រាអែលដែលត្រូវបានឃុំខ្លួន នៅតំបន់ហ្កាហ្សា កំពុងវិលត្រលប់មកផ្ទះសម្បែងរបស់ពួកគេវិញ ជាសារដ៏មានអត្ថន័យទៅកាន់អ្នកត្រូវបានចាប់ខ្លួន ខណៈដែលបទឈប់បាញ់ បានចូលជាធរមាន នៅក្នុងដែនដីប៉ាឡេស្ទីន។

លោក Witkoff បាននិយាយថា «សូមជូនចំពោះចំណាប់ថ្នូរផ្ទាល់ អ្នកកំពុងបានត្រលប់មកផ្ទះសម្បែងវិញហើយ» ដោយសម្ដីរបស់លោកបានជំរុញមានសំឡេងទះដៃ និងការអបអរសាទរពីមនុស្សរាប់ពាន់នាក់ដែលបានប្រមូលផ្តុំនៅឯទីលាន ក្នុងទីក្រុង Tel Aviv ដែលត្រូវបានគេស្គាល់ថា ជាទីលានរបស់ចំណាប់ថ្នូរ (Hostages' Square)។ ហើយអំឡុងពេលថ្លែងទៅកាន់ក្រុមគ្រួសាររបស់ចំណាប់ថ្នូរ លោកបានបន្ថែមថា «ភាពក្លាហានរបស់អ្នកបានផ្លាស់ប្តូរពិភពលោក»។

គួរបញ្ជាក់ថា ប្រជាជនអ៊ីស្រាអែលរាប់ម៉ឺននាក់ បានប្រមូលផ្តុំគ្នា នៅក្រោមអេក្រង់មួយ ក្នុងទីក្រុង Tel Aviv ដោយរំលឹករយៈពេល ៧៣៥ថ្ងៃ គិតចាប់តាំងពីក្រុមហាម៉ាស បានចាប់ខ្លួនចំណាប់ថ្នូរយកទៅកាន់តំបន់ហ្កាហ្សា ខណៈដែលនៅទីបំផុត ពួកគេហ៊ានសង្ឃឹមថា បទឈប់បាញ់នឹងជួយផ្ដល់សញ្ញាបញ្ចប់ក្ដីឈឺចាប់របស់ពួកគេ។

លោកស្រី Einav Zangauker ម្តាយរបស់ចំណាប់ថ្នូរ Matan Zangauker អាយុ ២៥ឆ្នាំ បាននិយាយថា៖ «អារម្មណ៍របស់ខ្ញុំ គឺពិបាកនឹងថ្លាថ្លែងណាស់ ពោលគឺគ្មានពាក្យអ្វីត្រូវពណ៌នាអំពីអារម្មណ៍នោះឡើយ សម្រាប់ខ្ញុំ សម្រាប់ពួកយើង សម្រាប់ប្រជាជនអ៊ីស្រាអែលទាំងអស់ ចង់ឲ្យចំណាប់ថ្នូរវិលមកផ្ទះសម្បែងវិញ ហើយរង់ចាំឃើញពួកគេទាំងអស់ត្រលប់មកវិញយ៉ាងអន្ទះសារ»។ បន្ថែមពីលើសម្ដីនោះ អ្នកចូលរួមម្នាក់ទៀត (ឈ្មោះ Zairo Shachar Mohr Munder) បានប្រាប់ថា៖ «នៅទីបំផុត យើងមានអារម្មណ៍ថា មានក្ដីសង្ឃឹមហើយ ប៉ុន្តែយើងមិនអាច និងនឹងមិនបញ្ឈប់ នាពេលនេះទេ»។

នៅឯ «ទីលានចំណាប់ថ្នូរ» កណ្តាលទីក្រុង Tel Aviv មនុស្សជាច្រើន នៅទីនោះ បានពាក់អាវយឺតដែលមានរូបមុខរបស់អ្នកដែលនៅតែជាប់ឃុំខ្លួន នៅហ្កាហ្សា និងអ្នកដែលអាចត្រូវបានដោះលែងនៅថ្ងៃចន្ទសប្ដាហ៍ក្រោយ។ អ៊ីស្រាអែល និងក្រុមហាម៉ាស បានឈានដល់កិច្ចព្រមព្រៀងបទឈប់បាញ់គ្នា កាលពីថ្ងៃសុក្រ ដែលសម្របសម្រួលដោយប្រធានាធិបតីអាមេរិក លោក Donald Trump ដោយបានបង្ហាញពីជំហានដ៏សំខាន់មួយឆ្ពោះទៅរកការបញ្ចប់សង្គ្រាមដ៏បំផ្លិចបំផ្លាញរយៈពេល ២ឆ្នាំ នៅក្នុងដែនដីប៉ាឡេស្ទីន៕