កំពង់ឆ្នាំង៖ លោកជំទាវ កែ ច័ន្ទមុនី អ្នកតំណាងរាស្រ្តមណ្ឌលកំពង់ឆ្នាំង រួមដំណើរដោយ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោក សេង វិចិត្រ អភិបាល​ស្រុក​រលា​ប្អៀរ ​និងអាជ្ញាធរមូលដ្ឋាន នៅព្រឹកថ្ងៃទី១២ ខែតុលា ឆ្នាំ២០២៥នេះបាន​ចុះពិនិត្យ​មើល​ស្ថាន​ភាព​ទឹកជំនន់ និង​សាកសួរសុខទុក្ខដល់ប្រជាពលរដ្ឋដែលបានរងផលប៉ះពាល់ដោយទឹកជំនន់ នៅឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។

ប្រជាពលរដ្ឋដែលរងផលប៉ះពាល់ពីទឹកជំនន់ បានបញ្ជាក់ថា ស្ថានភាពទឹកជំនន់​នៅតែបន្ត​ឡើង​ជា​បន្ត បង្កឱ្យពួកគាត់មានការព្រួយបារម្មណ៍ ក្នុងកម្រិតទឹកដ៍ខ្ពស់មួយនេះ ដែលពេលនេះ ក្រុម​គ្រួសារ​របស់គាត់ បានមករស់នៅតំបន់មានសុវត្ថិភាពនៃឃុំស្វាយជ្រុំ។ ពួកគាត់បានថ្លែង​អំណរ​គុណ​យ៉ាង​ជ្រាលជ្រៅចំពោះអាជ្ញាធរខេត្ត ស្រុក និងអ្នកតំណាងរាស្រ្ត ដែលបានផ្តល់អំណោយ​ជា​អង្ករ​ ថវិកា ដើម្បីសម្រួលដល់ការលំបាកក្នុងពេលមករស់នៅទីទួលមានសុវត្ថិភាពនាពេលនេះ។

លោក សេង វិចិត្រ អភិបាលស្រុករលាប្អៀរ បានថ្លែងថា: នៅឆ្នាំនេះស្រុករលាប្អៀរ បាន​រង​នូវ​ផ​ល​ប៉ះ​ពាល់​ពីទឹកជំនន់ បានធ្វើឱ្យប៉ះពាល់ការរស់នៅ ប្រកបរបររបស់ប្រជាពលរដ្ឋផងដែរ ជាមួយ​គ្នា​នេះ​ផង​ដែរ អាជ្ញាធរមូលដ្ឋាននៅគ្រប់ឃុំដែលរងផលប៉ះពាល់បានចុះពិនិត្យមើល​ជាក់​ស្តែង​អំពី​ផល​ប៉ះពាល់​ខូចខាតរបស់ប្រជាពលរដ្ឋ ដែលកំពុងគំរាមកំហែងពីទឹកជំនន់នេះ និង បានឱ្យ​ប្រជាពលរដ្ឋ​ដែល​កំពុងរស់នៅក្នុងភូមិដ្ឋានបង្កើនការប្រុងប្រយ័ត្នខ្ពស់ ហើយបានជន្លៀសចេញ​ទៅ​តំបន់​ទីទួលសុវត្ថិភាព ។

ឯកឧត្តមស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោកជំទាវ កែ ចន្ទមុនី អ្នក​តំណាង​រាស្រ្ត​មណ្ឌល​កំពង់ឆ្នាំង បានថ្លែងអំណរគុណយ៉ាងជ្រាលជ្រៅចំពោះអាជ្ញាធរភូមិ ឃុំ ស្រុក ដែលបាន​យក​ចិត្ត​ទុកដាក់ខ្ពស់ជាមួយនឹងប្រជាពលរដ្ឋ ក្នុងពេលដែលពួក​គាត់​ជួប​ការ​លំបាក​ដោយ​គ្រោះ​ជំនន់​ទន្លេសាបទឹក និងកំពុងជន់ឡើងជាបន្តបន្ទាប់នេះ ហើយបានបង្ក​ឱ្យ​រង​នូវ​​​ផល​ប៉ះពាល់​ដល់​ជីវភាព​គ្រួសារប្រជាពលរដ្ឋ ។ 

អាជ្ញាធរមូលដ្ឋាន ត្រូវបន្តការយកចិត្តទុកដាក់ ចំពោះសុវត្ថិភាពប្រជាពលរដ្ឋ ទាំងតាមខ្នងផ្ទះ ដែល​ទទួលទឹកជំនន់ និងទាំងប្រជាពលរដ្ឋ ដែលបានជម្លៀសទៅកាន់ទីទួលសុវត្ថិភាព ​ក្រៅ​ពី​នោះ​អាជ្ញាធរពាក់ព័ន្ធ ក៏ត្រូវបន្តតាមដាន សភាពការណ៍ និងស្ថានភាពទឹកជាប្រចាំ ដើម្បី​បន្ត​ជួយ​អន្តរាគមន៍ ទាន់ពេលវេលា ។ក្នុងករណីបើមានជំងឺដង្កាត់ផ្សេងៗ ឬមានសត្វអសិរពិសចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែក មណ្ឌលសុខភាព ឬប៉ុស្តិ៍​សុខ​ភាព​ដែល​នៅ​ជិត​បំផុត ដែលមានក្រុមគ្រូពេទ្យ និងឱសថគ្រប់គ្រាន់ សម្រាប់ធ្វើការព្យាបាលភ្លាមៗ មិ​ន​ត្រូវ​ទុក​ឱ្យមានគ្រោះថ្នាក់ដល់អាយុជីវិតនោះឡើយ ។ នៅក្នុងឱកាសនោះ ឯកឧត្តម បាននាំ​យកនូវ​គ្រឿង​ឧបភោគ បរិភោគ និង ថវិកាចែកជូន​ដល់​ប្រជាពលរដ្ឋ​ដែល​រង​ផល​ប៉ះ​ពាល់​ដោយ​ទឹក​ជំនន់​ផង​ដែរ​៕  កាំង ហុងវាស្នា