​សហរដ្ឋអាមេរិក៖ លោក​ប្រធានាធិបតី​សហរដ្ឋអាមេរិក Joe Biden បាន​ប្រកាស​កាលពី​ព្រឹក​ថ្ងៃ​ព្រហស្បតិ៍​ថា មេដឹកនាំ​ក្រុម​រដ្ឋ​អ៊ីស្លាមលោក Abu Ibrahim al-Hashimi al-Qurayshi ត្រូវ​បាន​សម្លាប់​កាលពី​ថ្ងៃ​ពុធ អំឡុង​ការ​វាយឆ្មក់​ប្រឆាំង​ភេរវកម្មដឹកនាំ​ដោយ​អាមេរិក​នៅ​ក្នុង​ប្រទេស​ស៊ី​រី​ភាគ​ខាងជើង។

​នេះ​គឺជា​ការ​វាយឆ្មក់​ដ៏​ធំ​បំផុត​របស់​សហរដ្ឋអាមេរិក​នៅក្នុង​ប្រទេស​នេះ ចាប់តាំងពី​ប្រតិបត្តិ​ការណ៍​ឆ្នាំ២០១៩ ដែល​បានសម្លាប់​មេដឹកនាំ​រដ្ឋ​អ៊ីស្លាម Abu Bakr al-Baghdadi​។ យោងតាម​មន្ទីរ​បញ្ច​កោណ ក្រុមមន្ត្រី​រដ្ឋបាល​រប​ស់លោក Biden បាន​និយាយថា លោក Qurayshi បាន​បំផ្ទុះ​គ្រាប់បែក​សម្លាប់​ខ្លួនឯង ខណៈដែល​កងកម្លាំង​អាមេរិកបាន​ចូលទៅ​កាន់តែ​ជិត​ទីតាំង​របស់គេ ហើយ​ការ​បំផ្ទុះ​នោះ​បានបណ្ដាល​ឲ្យ​ជន​ស៊ីវិល​ជាច្រើន​នាក់​ស្លាប់ បើទោះបី​ជាការ​បញ្ជាក់​ពី​ចំនួន​មានការ​ខុសគ្នារវាង​រដ្ឋបាល​លោក Biden និង​ក្រុម​ការពារ​ជន​ស៊ីវិល​ស៊ី​រី​ក៏ដោយ​។​ លោក Biden បាន​និយាយ​ចេញពី​សេត​វិមាន​កាលពី​ព្រឹក​ថ្ងៃ​ព្រហស្បតិ៍​ដោយ​ប្រកាស​ថា ប្រតិបត្តិការនេះ​បាន​កម្ចាត់​មេដឹកនាំ​ភេរវ​ករ​ដ៏​សំខាន់​ដោយ​និយាយ​ថា សហរដ្ឋអាមេរិក​បាន​ជ្រើសរើស​ប្រើ​ប្រតិបត្តិការ​កម្លាំង​ពិសេស​ ដើម្បី​ព្យាយាម​កុំ​ឲ្យ​មានការ​បាត់បង់​អាយុជីវិត​ជន​ស៊ីវិល​ច្រើន៕

អត្ថបទ៖ សុខមាន